កង្វះ​តម្លាភាព និង​ការ​អនុវត្ត​ច្បាប់ ​ធ្វើ​ឲ្យ​ការ​អភិវឌ្ឍ​ហេដ្ឋារចនាសម្ព័ន្ធ​មួយ​ចំនួន ​ជួប​បញ្ហា

Languages

banner realestate

 Axis Residences

KHMER CAPITAL MICROFINANCE INSTITUTION PLC

vtrust

SurinPhumi – Eco-Green Community

កម្មករ​កំពុង​បោសសម្អាត​ផ្លូវ​នៅ​ក្នុង​ការដ្ឋាន​សាងសង់​បុរី​មួយ​កន្លែង​ក្នុង​រាជធានី​ភ្នំពេញ ។ ហុង មិនា
 

ប្រព័ន្ធ​ហេដ្ឋារចនាសម្ព័ន្ធ​ដែល​មាន​ទំហំ​តូចៗ គឺជា​បញ្ហា​ដែល​កំពុង​កើត​មាន​នៅ​កម្ពុជា​នាពេល​បច្ចុប្បន្ន ខណៈ​មន្ត្រី​ជំនាញ​បាន​បន្ទោស​បញ្ហា​ទាំង​នោះ​ថា បណ្តាល​មកពី​ការ​អនុវត្ត​ច្បាប់​នៅ​មាន​កម្រិត និង​កង្វះ​តម្លាភាព ដែល​ជា​ហេតុ​ធ្វើ​ឲ្យ​ផ្លូវ​មួយ​ត្រូវ​បាន​ប្រជាពលរដ្ឋ​ទន្ទ្រាន​យក​ទៅ​ប្រើប្រាស់​ជា​កម្មសិទ្ធិ​ផ្ទាល់​ខ្លួន​។

អ្នក​ជំនាញ​ផ្នែក​អភិវឌ្ឍន៍​ទីក្រុង​បាន​ជំរុញ​ឲ្យ​មាន​ប្លង់គោល​ឱ្យ​បាន​លឿន និង​ត្រូវ​ជំរុញ​ការ​អនុវត្ត​ច្បាប់​ឲ្យ​កាន់តែ​មាន​ប្រសិទ្ធភាព​បន្ថែម​ទៀត​។

លោក​បណ្ឌិត វ៉ាន់ វ៉ាត អ្នក​ឯកទេស​ផ្នែក​នគរូបនីយកម្ម​បាន​ថ្លែង​ឲ្យ​ដឹង​តាម​ទូរស័ព្ទ​កាលពី​ពេល​ថ្មីៗ​នេះ​ថា ការ​ធ្វើ​គោលនយោបាយ​អភិវឌ្ឍន៍​ដែល​មាន​ដូចជា ការ​ពង្រីក​ផ្លូវ ការ​ធ្វើ​ផ្លូវ និង​ការ​កំណត់​តំបន់​ប្រើប្រាស់​ដីធ្លី ជាដើម គឺ​សុទ្ធតែ​ស្ថិត​នៅ​ក្រោម​សមត្ថកិច្ច​របស់​ក្រសួង​រៀបចំ​ដែនដី នគរូបនីយកម្ម និង​សំណង់ ខណៈ​ការ​អនុវត្ត​ក៏​មាន​ការ​ចូលរួម​ពី​ក្រសួង​សាធារណការ និង​ដឹកជញ្ជូន ព្រម​ទាំង​អាជ្ញាធរ​មូលដ្ឋាន​ផង​ដែរ​។

លោក​បណ្ឌិត​មាន​ប្រសាសន៍​ថា៖ «​ការ​ពង្រីក​ផ្លូវ ឬ​ការ​រៀបចំ​ហេដ្ឋារចនាសម្ព័ន្ធ គឺ​ត្រូវ​ធ្វើ​តាម​ប្លង់​មេ​របស់​អាជ្ញាធរ ហើយ​ការ​អនុវត្ត​នោះ​ត្រូវ​ធ្វើ​តាម​ច្បាប់ និង​មាន​តម្លាភាព​»​។

លោក​បាន​លើក​ឧទាហរណ៍​ថា៖ «​រដ្ឋាភិបាល​ត្រូវ​ពង្រីក​ផ្លូវ​មួយ​ឲ្យ​មាន​ទំហំ​ដល់​ ៣០ ​ម៉ែត្រ ដើម្បី​ផលប្រយោជន៍​រួម​។ ការ​ពង្រីក​ផ្លូវ​នេះ​នឹង​ធ្វើឲ្យ​មាន​ផលប៉ះពាល់​ខ្លះ​ដល់​ប្រជាពលរដ្ឋ ដូច្នេះ​នៅ​ពេល​ដោះស្រាយ​គឺ​ត្រូវ​ធ្វើឲ្យ​មាន​តម្លាភាព និង​អាច​ទទួល​យក​បាន​ទាំងអស់​គ្នា​»​។

ការ​បំពាន​យក​ចិញ្ចើម​ផ្លូវ​សាធារណៈ​ទៅ​ធ្វើ​ជា​កម្មសិទ្ធិ​ឯកជន ក៏​ដូចជា​ការ​លក់ដូរ​នៅ​តាម​ចិញ្ចើមផ្លូវ គឺជា​រឿង​ដែល​អាច​និយាយ​បាន​ថា​បណ្តាល​មកពី​ការ​អនុវត្ត​ច្បាប់​នៅ​មាន​ភាព​ទន់ខ្សោយ ព្រោះ​ប្រទេស​យើង​មាន​ច្បាប់ មាន​សេចក្តី​ណែនាំ និង​មាន​អនុក្រឹត្យ​បាន​ចែង​ច្បាស់លាស់​ហើយ​។

ជាក់ស្តែង​សេចក្តី​ជូន​ដំណឹង​លេខ​ ៤៤ របស់​ក្រសួង​រៀបចំ​ដែនដី នគរូបនីយកម្ម និង​សំណង់ ដែល​បាន​ចែង​ពី​ការ​ចោល​ចិញ្ចើម​ផ្លូវ​ ៥ ​ម៉ែត្រ​សម្រាប់​លំនៅឋាន​ធម្មតា ប៉ុន្តែ​ដោយសារ​ការ​ផ្សព្វផ្សាយ និង​ការ​អនុវត្ត​នៅ​មាន​កម្រិត​ទើប​ប្រជាពលរដ្ឋ​នៅ​តែ​បំពាន​ចិញ្ចើម​ផ្លូវ​ប្រើប្រាស់​ជា​កម្មសិទ្ធិ​។ លោក​បណ្ឌិត វ៉ាន់ វ៉ាត បញ្ជាក់​ឲ្យ​ដឹង​ដូច្នេះ​។

លោក​បណ្ឌិត វ៉ាន់ វ៉ាត បាន​ថ្លែង​ថា​រាជរដ្ឋាភិបាល​មិនមែន​មិន​គិតគូរ​ចំពោះ​បញ្ហា​នេះ​ទេ គ្រាន់​តែ​មាន​ភាព​ខ្វះ​ចន្លោះ​ក្នុង​ការ​រៀបចំ​ក្រុង​តាម​ប្លង់គោល​។

លោក​បាន​បន្ត​ថា នៅ​ប្រទេស​អភិវឌ្ឍន៍​គេ​អនុវត្ត​តាម​ប្លង់គោល​ប្រើប្រាស់​ដីធ្លី​ជា​មុន ទើប​ក្រុម​ការងារ​ចុះ​បញ្ជី​ដីធ្លី​ចុះ​ធ្វើ​ការងារ​របស់​ខ្លួន​ដោយ​អនុវត្ត​តាម​ប្លង់គោល​លម្អិត​ដែល​បាន​រៀបចំ​រួច​ហើយ​។

ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា លោក​បណ្ឌិត គីម ហ៊ាង បាន​និយាយ​ថា ព័ត៌មាន​ដែល​ទាក់ទង​ទៅ​នឹង​ប្លង់​មេ​សម្រាប់​រាជធានី​ភ្នំពេញ​ត្រូវ​បាន​លេចឮ​ជាយូរ​មក​ហើយ ប៉ុន្តែ​ជាក់ស្តែង​រហូត​មក​ដល់​ពេល​នេះ​ប្លង់​មេនោះ​មិន​ទាន់​ត្រូវ​បាន​ធ្វើការ​ផ្សព្វផ្សាយ​ជា​សាធារណៈ​នោះ​ទេ​។ នៅពេល​មាន​ប្លង់​មេ​ច្បាស់លាស់ វា​នឹង​ធ្វើឲ្យ​ការ​អភិវឌ្ឍ​កាន់តែ​មាន​ភាព​ងាយស្រួល និង​ដំណើរការ​លឿន​ទៅ​មុខ​បន្ថែម​ទៀត​។

លោក​បណ្ឌិត​មាន​ប្រសាសន៍​ថា៖ «​ខ្ញុំ​បានឮ​ព័ត៌មាន​ប្លង់​មេ​នោះ​ជា​យូរ​មក​ហើយ តែ​រហូត​មក​ដល់​ពេល​នេះ​ខ្ញុំ​មិន​ដែល​ឃើញ​ប្លង់​មេ​នោះ​ត្រូវ​បាន​ផ្សព្វផ្សាយ​ជា​ផ្លូវការ​ឡើយ​។ ការ​អូសបន្លាយ​ពេលវេលា​នេះ ខ្ញុំ​គិត​ថា​ប្រហែល​ជា​អាជ្ញាធរ​ត្រូវការ​ពេលវេលា​កែលម្អ​បន្ថែម​ទៀត ដើម្បី​ឲ្យ​ស្រប​ទៅ​តាម​ការ​រីកចម្រើន​នៃ​រាជធានី​ភ្នំពេញ​ដែល​កាន់​តែ​រីក​ធំឡើង​ជា​បន្តបន្ទាប់​»​។

ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា​បាន​លើក​ឡើង​ថា ការ​មាន​ប្លង់​មេ គឺជា​រឿង​ដ៏ល្អ​សម្រាប់​ទីក្រុង ឬ​ប្រទេស ដោយ​វា​នឹង​ផ្តល់​ភាព​ងាយស្រួល​សម្រាប់​ការ​អភិវឌ្ឍ ជាពិសេស​សម្រាប់​ប្រទេស​កំពុង​អភិវឌ្ឍន៍​ដូចជា​កម្ពុជា​។ ប្លង់​មេ​នឹង​ជួយ​ឲ្យ​អ្នក​វិនិយោគ មាន​ភាព​ងាយស្រួល​ក្នុង​ការ​តម្រង់​ទិស​អាជីវកម្ម​របស់​គាត់ ព្រោះ​នៅ​ក្នុង​ប្លង់​មេ​នឹង​មាន​ការ​កំណត់​ទីតាំង​ដីធ្លី​ (​តំបន់​) ​សម្រាប់​អភិវឌ្ឍ​ច្បាស់លាស់​។ ប្រសិន​បើ​ក្នុង​ប្លង់​មេ​កំណត់​យក​តំបន់​ណា​ជា​តំបន់​ឧស្សាហកម្ម គឺ​គេ​នឹង​មិន​អនុញ្ញាត​ឲ្យ​សង់​អ្វី​ដែល​ខុស​ពី​ឧស្សាហកម្ម​នោះ​ទេ​។

លោក​បណ្ឌិត គីម ហ៊ាង បាន​បញ្ជាក់​ថា៖ «​ការ​សាងសង់​ដែល​មិន​មាន​ប្លង់​មេ គឺ​ប្រៀប​ដូចជា​ការ​រាវ​រក​អ្វី​មួយ​ដែល​មិន​មាន​ទិសដៅ​ច្បាស់លាស់​។ ការ​សាងសង់​ខ្លះ​អាច​នឹង​មាន​បញ្ហា​ប្រឈម​ជាមួយ​ច្បាប់ ឬ​ការ​វាយកម្ទេច​ផង​ដែរ ក្នុង​ករណី​ខុស​ពី​អ្វី​ដែល​បាន​កំណត់​នៅ​ក្នុង​ប្លង់​មេ​។ ដូច្នេះ​ប្លង់​មេ គឺជា​អ្វី​ដែល​អ្នក​វិនិយោគ​ចង់​បាន​បំផុត​»​។

បច្ចុប្បន្ន​ការ​រំលោភ​បំពាន​ចិញ្ចើម​ផ្លូវ​ពី​សំណាក់​ម្ចាស់​លំនៅឋាន ពិសេស​ម្ចាស់​ផ្ទះល្វែង​បាន​កើត​មាន​ជាទូទៅ​នៅ​តាម​សង្កាត់​នានា​ក្នុង​រាជធានី​ភ្នំពេញ ដោយ​មាន​ខ្លះ​បាន​សុំ​ការ​អនុញ្ញាត​ពី​អាជ្ញាធរ​មូលដ្ឋាន និង​ខ្លះ​ទៀត​មិន​បាន​សុំ​អាជ្ញាធរ​មូលដ្ឋាន​ទេ​។

ប្រធាន​សមាគម​អ្នក​អភិវឌ្ឍន៍​លំនៅឋាន​កម្ពុជា​លោក​ឧកញ៉ា លី ហួរ បាន​ប្រាប់​ថា​ការ​សាងសង់​ផ្លូវ​នៅ​តាម​បុរី​នានា​រដ្ឋាភិបាល​មិន​បាន​ជួយ​ឧបត្ថម្ភ​មូលធន​នោះ​ទេ គឺ​ម្ចាស់​បុរី​នីមួយៗ​ជា​អ្នក​រៀបចំ និង​ធ្វើ Master Plan ដោយ​ខ្លួនឯង ប៉ុន្តែ​គម្រោង​សាងសង់​ផ្លូវ​នានា​នៅ​ក្នុង​បុរី​ក៏​ត្រូវ​តែ​ដាក់​ឆ្លង​ក្រសួង​រៀបចំ​ដែនដី ពិនិត្យ​ផងដែរ​។

លោក​ឧកញ៉ា​ថ្លែង​ថា៖ «​គម្រោង​លំនៅឋាន​ទាំងអស់ លើក​លែង​តែ​គម្រោង​លំនៅឋាន​សម្រាប់​ប្រជាជន​មាន​ប្រាក់​ចំណូល​ទាប ទើប​រដ្ឋាភិបាល​ជួយ​សាងសង់ ផ្លូវ តភ្ជាប់​បណ្តាញ​ទឹក និង​អគ្គិសនី​ជូន​»​។

លោក​ឧកញ៉ា សៀ ឫទ្ធី ប្រធាន​ក្រុម​ប្រឹក្សា​ភិបាល​នៃ​ក្រុមហ៊ុន WorldBridge Group ដែល​កំពុង​វិនិយោគ​លំនៅឋាន​មាន​តម្លៃ​ទាប​ស្ថិត​ក្នុង​ឃុំ​កោះ​រកា ស្រុក​ស្អាង ខេត្ត​កណ្តាល បាន​ថ្លែង​ថា​ជា​គោលការណ៍​របស់​រាជរដ្ឋាភិបាល គឺ​នឹង​ជួយ​តភ្ជាប់​បណ្តាញ​ផ្លូវ ទឹក ភ្លើង​ចូល​ក្នុង​បុរី ប៉ុន្តែ​បច្ចុប្បន្ន​នេះ​យើង​កំពុង​រង់ចាំ​ការ​សម្រេច​ពី​ក្រសួង​សេដ្ឋកិច្ច និង​ហិរញ្ញវត្ថុ​។ ចំពោះ​ផ្លូវ​នៅ​តាម​បុរី​នីមួយៗ លោក​ឧកញ៉ា​បាន​អះអាង​ថា ផ្លូវ​ក្នុង​បុរី​គឺ​ក្រុមហ៊ុន​ធ្វើ​ដោយ​ខ្លួនឯង និង​ស្ថិត​ក្រោម​ការ​ត្រួតពិនិត្យ​របស់​ក្រសួង​ដែនដី​។

លោក​មាន​ប្រសាសន៍​ថា៖ «​ពេល​ណា​យើង​ដាក់​ប្លង់​ស្នើសុំ​ទៅ​ក្រសួង​ជាធម្មតា​ក្រសួង​នឹង​ពិនិត្យ​មើល​មុន​សម្រេច​ឲ្យ​សាងសង់ ឬ​អត់​។ បើ​ទំហំ​ផ្លូវ​តូច​ពេក​ក្រសួង​អាច​ស្នើសុំ​ឲ្យ​យើង​ពង្រីក​បន្ថែម​»​។

 

Content image - Phnom Penh Post
ទីតាំង​ជាច្រើន​កន្លែង​នៅ​ក្នុង​រាជធានី​ភ្នំពេញ​បាន​យក​ចិញ្ចើម​ថ្នល់​ប្រើប្រាស់​ជា​កម្មសិទ្ធិ​ឯកជន ។ ផា លីណា

 

មេភូមិ​វិហារ​សួគ៌​ខាង​ត្បូង​ស្ថិត​ក្នុង​ឃុំ​វិហារ​សួគ៌ ស្រុក​ខ្សាច់​កណ្តាល ខេត្ត​កណ្តាល​ដែល​ជា​តំបន់​កំពុង​មាន​ការ​អភិវឌ្ឍ​លឿន​លោក ប៉ាន សេង បាន​និយាយ​ថា ការ​សាងសង់​ផ្លូវ​ក្នុង​មូលដ្ឋាន​កន្លង​មក​តែងតែ​ជួប​ការ​លំបាក ដោយសារ​ប៉ះពាល់​ផលប្រយោជន៍​ប្រជាជន​មូលដ្ឋាន ដែល​ធ្វើឲ្យ​ការ​ពង្រីក និង​ទុក​ចំណី​ផ្លូវ​ពី​អ័ក្ស​ផ្លូវ​ (​ចំណុច​កណ្តាល​ផ្លូវ​) ​មិន​អាច​ធ្វើ​តាម​ផែនការ​បាន​ ១០០ ​ភាគរយ​នោះ​ទេ ទោះ​ជា​រដ្ឋាភិបាល​បាន​ផ្តល់​សំណង​ដល់​ពួកគាត់​ក្តី​។

លោក​បន្ត​ថា៖ «​ជាគោលការណ៍​ណែនាំ​ពី​ក្រសួង គឺ​ទុក​ចំណី​ផ្លូវ​ ២៥ ​ម៉ែត្រ​ពី​អ័ក្ស​ផ្លូវ​ក្នុង​ឃុំ និង​ ៣០ ​ម៉ែត្រ​ពី​អ័ក្ស​ផ្លូវជាតិ ប៉ុន្តែ​ការ​ធ្វើ​ជាក់ស្តែង​មិន​បាន​តាម​ផែនការ​ទេ ដោយសារ​ប៉ះ​ប្រយោជន៍​ប្រជាជន​»​។ លោក​បន្ត​ថា៖ «​កន្លង​មក​ការ​ទុក​ចំណី​ផ្លូវ​ទំហំ​ ២៥ ​ម៉ែត្រ​ក្នុង​ឃុំ គឺ​ធ្វើ​បាន​តែ​ ១០ ​ម៉ែត្រ​ប៉ុណ្ណោះ ដោយសារ​បញ្ហា​ខាង​លើ​នេះ​»​។

លោក​បន្ត​ថា៖ «​មូលនិធិ​សម្រាប់​ប្រើប្រាស់​ក្នុង​ការ​កសាង​ផ្លូវ​ក្នុង​មួយ​ឆ្នាំៗ​មាន​តិច​ណាស់ មិន​អាច​ធ្វើ​អ្វី​បាន​ឡើយ ប៉ុន្តែ​លោក​មិន​បង្ហើប​ឲ្យ​ដឹង​ពី​ចំនួន​ទេ​»​។

លោក​នាយក​រដ្ឋមន្ត្រី ហ៊ុន សែន កាលពី​សប្តាហ៍​កន្លង​មក​នៅ​ពេល​អញ្ជើញ​ចូលរួម​ក្នុង​ពិធី​បើក​សម្ពោធ​ឱ្យ​ដំណើរការ​ជា​ផ្លូវការ​នូវ​រោងចក្រ​ផលិត​ស៊ីម៉ងត៍ ជីបម៉ុង អ៊ិនស៊ី ស៊ីមិន នៅ​ខេត្ត​កំពត​បាន​បាន​ប្រសាសន៍​ថា កំណើន​ប្រជាជន​ និង​សេដ្ឋកិច្ច​បាន​ធ្វើឲ្យ​កម្ពុជា​ត្រូវការ​ការ​ពង្រីក​ផ្លូវ​ជា​បន្តបន្ទាប់ ជាក់ស្តែង​ផ្លូវជាតិ​ដែល​ពេល​ស្ថាបនា​ដំបូង​មាន​ទទឹង​ ៦-៧ ​ម៉ែត្រ​ត្រូវ​បាន​ពង្រីក​ឡើង​ជា​បន្តបន្ទាប់​ដោយ​បច្ចុប្បន្ន​នេះ​មាន​មួយ​ចំនួន​ត្រូវ​បាន​ពង្រីក​រហូត​ដល់​ទទឹង​ ៣០ ​ម៉ែត្រ​។

អ្នក​នាំពាក្យ​នៃ​ក្រសួង​រៀបចំ​ដែនដី នគរូបនីយកម្ម និង​សំណង់ លោក សេង ឡូត មិន​លើក​ទូរស័ព្ទ ទោះ​ទូរស័ព្ទ​ចូល​ជា​ច្រើន​ដង​ក្តី​៕

Source From : Property Area

 

 

Latest News

ដោយដែន ចែងចាំង ​ភ្នំពេញ: តម្រូវការការងារក្នុងវិស័យសំណង់ និងអចលនទ្រព្យបានកើនឡើងខ្ពស់ស្របពេលការរីកចម្រើនលើវិស័យសំណង់...
ដោយ គង់ សូរិយា ​ភ្នំពេញ: ខេត្តភូមិភាគឥសាន្តប្រទេស...
ដោយវុត្ថា យោងតាមការទិន្ន័យផ្លូវការរបស់មន្ត្រីរដ្ឋាភិបាលចិន បានបង្ហាញនៅថ្ងៃអង្គារិ៍នេះ ថា...

LATEST EXCLUSIVE LISTING

Land For Sale
Ou Saray,Tram Kak
USD 18.00/SQM
Land For Sale
Chorm Chao,Porsenchey
USD 470,000.00
Condominuim For Sale
Tonle Bassak,Chamkarmon
USD 158,000.00
Condominuim For Sale
Tonle Bassak,Chamkarmon
USD 185,000.00
Flat House For Sale
Trapang Krasang,Porsenchey
USD 60,000.00

CVEA MEMBERS