ប្រជាពលរដ្ឋ​រីករាយ​ដោយសារ​ដី​ឡើង​ថ្លៃ ខណៈ​អ្នក​ជំនាញ​ថា​តំបន់​ជុំវិញ​ព្រលាន​យន្តហោះ​មិន​ល្អ

Languages

banner realestate

 Axis Residences

KHMER CAPITAL MICROFINANCE INSTITUTION PLC

vtrust

SurinPhumi – Eco-Green Community

 
អ្នកនាង ធីតា បាន​បន្ថែម​ថា៖ «​ទោះ​ជា​យ៉ាង​ណា​ក៏ដោយ ខ្ញុំ​គិត​ថា​ការ​សាងសង់​ព្រលាន​យន្តហោះ​ថ្មី​មាន​ចំណុច​វិជ្ជមាន​ច្រើន​ជាង​អវិជ្ជមាន​»៕​ទីតាំង​ដី​លក់​មួយ​កន្លែង​ស្ថិត​នៅ​ក្បែរ​រាជធានី​ភ្នំពេញ​នាពេល​កន្លង​មក​។ ស្រេង ម៉េងស្រ៊ុន

ប្រជាពលរដ្ឋ​មូលដ្ឋាន​ស្ថិត​ក្នុង​ឃុំ​កណ្តោក ស្រុក​កណ្តាលស្ទឹង ខេត្ត​កណ្តាល និង​អ្នក​មាន​អចលនទ្រព្យ​នៅ​ក្បែរៗ​ទីតាំង​ដែល​រាជរដ្ឋាភិបាល​កម្ពុជា​គ្រោង​នឹង​សាងសង់​ព្រលាន​យន្តហោះ​អន្តរជាតិ​ភ្នំពេញ​ (​ថ្មី​) បាន​សម្តែង​នូវ​ក្តី​រីករាយ​យ៉ាង​ខ្លាំង​ជាមួយ​នឹង​ការ​ទាមទារ​តម្លៃ​ដីធ្លី​ទៅ​តាម​ការ​ចង់​បាន​របស់​ពួកគេ ខណៈ​អ្នក​ជំនាញ​អះអាង​ថា​ដីធ្លី​នៅ​ក្បែរ​ព្រលាន​យន្តហោះ​មិន​មាន​សក្តានុពល​ខ្លាំងក្លា​នោះ​ទេ​។

លោក ហេង ចាន់ មេឃុំ​កណ្ដោក ស្រុក​កណ្ដាលស្ទឹង ខេត្ត​កណ្តាល​បាន​ថ្លែង​ឲ្យ​ដឹង​តាមរយៈ​ទូរស័ព្ទ​កាលពី​ថ្ងៃ​ចន្ទ​ថា​គម្រោង​សាងសង់​ព្រលាន​យន្តហោះ​អន្តរជាតិ​ថ្មី​នេះ​បាន​ជួយ​ធ្វើឲ្យ​ដីធ្លី​ក្នុង​តំបន់​របស់​លោក​ហក់​ឡើង​មួយ​កម្រិត ប៉ុន្តែ​ប្រជាជន​រស់នៅ​តំបន់​នេះ​មិន​សូវ​មាន​ដី​ច្រើន​នោះ​ទេ ដោយ​ដី​ភាគច្រើន​ជា​ដី​របស់​ឧកញ៉ា និង​អ្នក​មាន​បណ្តា​បុណ្យ​ស័ក្តិធំ​។

លោក​បាន​បញ្ជាក់​ថា៖ «​យ៉ាង​ណា​ក៏​ខ្ញុំ​រីករាយ​ព្រោះ​បើ​មាន​ការ​សាងសង់​ព្រលាន​យន្តហោះ​នៅ​តំបន់​នេះ វា​នឹង​ជួយ​ផ្ដល់​ឱកាស​ការងារ​ជាច្រើន​ដល់​ប្រជាជន​ក្នុង​មូលដ្ឋាន​ផង​ដែរ​»​។

ព្រលាន​យន្តហោះ​អន្តរជាតិ​ភ្នំពេញ​ថ្មី​ត្រូវ​បាន​ចុះ​ហត្ថលេខា​រវាង​ក្រុមហ៊ុន​ក្នុង​ស្រុក OCIC ជាមួយ​ក្រុមហ៊ុន​មកពី​ប្រទេស​ចិន​ក្នុង​អំឡុង​ពេល​ដំណើរ​ទស្សនកិច្ច​របស់​លោក លី ខឺឈាង នាយក​រដ្ឋមន្ត្រី​នៃ​សាធារណរដ្ឋ​ប្រជាមានិត​ចិន​កាលពី​ដើម​ខែ​មករា​កន្លង​មក​។ គម្រោង​សាងសង់​ព្រលាន​យន្តហោះ​ថ្មី​នេះ​ស្ថិត​នៅ​លើ​ផ្ទៃដី​ ២៦០០០ ​ហិកតា និង​គ្រោង​បោះទុន​វិនិយោគ​សាងសង់​សរុប​ចំនួន​ ១៥០០ ​លាន​ដុល្លារ​អាមេរិក​។

លោក មាន សាវ៉ាត ប្រជាពលរដ្ឋ​រស់នៅ​ក្នុង​ឃុំ​កណ្ដោក​បាន​លើក​ឡើង​ថា លោក​មាន​ការ​រីករាយ​ដែល​បាន​ឮ​ពី​គម្រោង​សាងសង់​ព្រលាន​យន្តហោះ​ថ្មី​នេះ​ដែល​វា​នឹង​ជួយ​ធ្វើឲ្យ​ដីធ្លី​របស់​ប្រជាជន​ក្នុង​តំបន់​ឡើង​ថ្លៃ ប៉ុន្តែ​សម្រាប់​លោក​ផ្ទាល់​គឺ​មាន​តែ​ដី​លំនៅឋាន​ប៉ុណ្ណោះ​មិន​មាន​សល់​ដី​សម្រាប់​លក់​នោះ​ទេ​។ ​

លោក​បាន​បន្ត​ថា ​​លោក​មិនដឹង​ពី​ហេតុផល​ពិតប្រាកដ​ដែល​នាំ​ឲ្យ​ដី​នៅ​តំបន់​នេះ​ឡើង​ថ្លៃ​នោះ​ទេ ហើយ​ប្រជាជន​ប្រហែល​ជា​គិត​ថា​តំបន់​នេះ​នឹង​មាន​ការ​អភិវឌ្ឍ​ខ្លាំង ទើប​ពួកគេ​ទាមទារ​តម្លៃ​ដី​របស់​ពួកគេ​ឡើង​ខ្ពស់​។

នៅ​ពេល​សាកសួរ​ពី​ទីតាំង​ពិតប្រាកដ​នៃ​ព្រលាន​យន្តហោះ​ថ្មី​លោក​ សាវ៉ាត បាន​ប្រាប់​ថា​លោក​មិន​ដឹង​ពី​ទីតាំង​នៅ​កន្លែង​ណា​ជាក់លាក់​នោះ​ទេ ហើយ​ក៏​មិន​បាន​ដឹង​ពី​ទីតាំង​នៅ​ជិត​ព្រលាន​យន្តហោះ​ដែល​នឹង​ត្រូវ​រង​ការ​រំខាន​ពី​សំឡេង និង​មិន​អាច​សាងសង់​អគារ​ខ្ពស់ៗ​បាន​នោះ​ទេ​។

លោក​បាន​និយាយ​ថា៖ «​ខ្ញុំ​រំពឹង​ថា​ការ​សាងសង់​ព្រលាន​យន្តហោះ​នាពេល​ខាង​មុខ​នឹង​អាច​ជួយ​ផ្លាស់ប្ដូរ​ជីវភាព និង​ការ​រស់នៅ​បែប​ស្រុកស្រែ​របស់​អ្នក​នៅ​ទី​នេះ​ទៅ​កាន់​តំបន់​មួយ​ដែល​មាន​ការ​រីកចម្រើន និង​អភិវឌ្ឍ​លឿន​»​។

តាម​ប្រភព​មួយ​បាន​អះអាង​ថា​កាលពី​មុន​ដី​នៅ​តំបន់​នេះ​ ១ ​ម៉ែត្រការ៉េ មាន​តម្លៃ​ចន្លោះ​ពី​ ២-៣ ​ដុល្លារ ចំណែក​ដី​បឹង​អាច​មាន​តម្លៃ​ទាប​ជាង​នេះ តែ​នៅ​ពេល​នេះ​គេ​អាច​ទារ​បាន​ចន្លោះ​ពី​ ១៥ ​ទៅ​ ៣០ ​ដុល្លារ​។

ទោះ​ជា​យ៉ាង​ណា​លោក អ៊ុង ប៊ុនធឿន ​បាន​សរសេរ​នៅ​លើ​បណ្តាញ​ទំនាក់​ទំនង​សង្គម​របស់​ខ្លួន​ថា​ការ​ពិត​នៅ​ប្រទេស​ជឿនលឿន ដី​នៅ​ក្បែរ​ព្រលាន​យន្តហោះ​មិន​ឡើង​ថ្លៃ​ខ្ពស់​ឡើយ ហើយ​ពេល​ខ្លះ​ថែម​ទាំង​មាន​តម្លៃ​ទាប​ទៀត​ផង​។ ដី​នៅ​ក្បែរ​ព្រលាន​យន្តហោះ​គឺ​មិន​សូវ​មាន​តម្លៃ​ដូច​ដី​នៅ​ក្បែរ​ស្ថានីយ​រថភ្លើង​នោះ​ទេ ព្រោះ​នៅ​ជិត​ស្ថានីយ​រថភ្លើង​គឺ​មាន​ភាព​ងាយស្រួល​ក្នុង​ការ​ធ្វើ​ដំណើរ​ទៅ​ធ្វើការ និង​ទៅ​សាលារៀន​ជាដើម​។

លោក​បាន​លើក​នូវ​ហេតុផល​មួយ​ចំនួន​ដូចជា ទី​ ១ តំបន់​ជុំវិញ​ព្រលាន​យន្តហោះ​មាន​ហានិភ័យ​ខ្ពស់ ដែល​អាច​នឹង​កើតឡើង​ភ្លាមៗ ទី​ ២ មិន​អាច​សាងសង់​អគារ​ខ្ពស់ៗ​បាន ទី​ ៣ រំខាន​ដោយសារ​សំឡេង​ឡើង​ចុះ​របស់​យន្តហោះ ទី​ ៤ មិន​អាច​រកស៊ី​អ្វី​ជា​ដុំកំភួន​បាន ព្រោះ​នៅ​ពេល​ណា​ដែល​គេ​ធ្វើ​ព្រលាន​រួច​គេ​នឹង​ធ្វើ​របង​ព័ទ្ធ​ជុំវិញ និង​នៅ​ពេល​មាន​ភ្ញៀវ​មក​ដល់​ត្រូវ​ឡើង​ជិះឡាន ឬ​រថភ្លើង​ទៅ​កាន់​ទីក្រុង ទី​ ៥ បើ​ទិញ​ប៉ះ​ចំ​ដី​ព្រលាន​នោះ​លក់​មិន​បាន​តម្លៃ​ខ្ពស់​នោះ​ទេ​ដោយ​រដ្ឋ​អាច​ជា​អ្នក​កំណត់​តម្លៃ​ទិញ​លក់​ផង​ដែរ​។

លោក ប៊ុនធឿន បាន​បន្ត​ថា៖ «​ខ្ញុំ​ធ្លាប់​រស់នៅ​កៀក​ព្រលាន​យន្តហោះ ដូច្នេះ​ខ្ញុំ​យល់​ពី​រឿង​ទាំងអស់​នេះ​»​។

អ្នក​នាំពាក្យ​នៃ​រដ្ឋលេខាធិការដ្ឋាន​អាកាសចរ​ស៊ីវិល​លោក ស៊ិន ចាន់សិរីវុត្ថា ​មាន​ប្រសាសន៍​ថា​ការពិត​ព្រលាន​យន្តហោះ​អន្តរជាតិ​ភ្នំពេញ​ (​ថ្មី​) ​ដែល​គេ​គ្រោង​នឹង​សាងសង់​នោះ​មាន​ទំហំ​ដី​ជាង​ ៧០០ ​ហិកតា​ប៉ុណ្ណោះ​។ ចំណែក​ផ្ទៃដី​ដែល​កាត់​ចេញ​ពី​ចំណែក​នៃ​គម្រោង​ទាំងមូល​ (​ទំហំ​ ២៦០០០ ​ហិកតា​) គឺ​សម្រាប់​សាងសង់​មជ្ឈមណ្ឌល​ពាណិជ្ជកម្ម និង​លំនៅឋាន​នានា​ដែល​ក្រុមហ៊ុន​បាន​គ្រោង​ទុក​រួច​ហើយ​។

លោក​បន្ត​ថា៖ «​ការ​វិនិយោគ​ព្រលាន​យន្តហោះ​មិន​ផ្តល់​ផលចំណេញ​ទេ ដូច្នេះ​មាន​តែ​ការ​សាងសង់​មជ្ឈមណ្ឌល​ពាណិជ្ជកម្ម​នៅ​ជុំវិញ​ប៉ុណ្ណោះ ទើប​ក្រុមហ៊ុន​អាច​រក​ផល​ចំណេញ​បាន​»​។ លោក​បន្ត​ថា៖ «​គម្រោង​បែប​នេះ​គេ​ហៅថា Airport City ​ដែល​មាន​ភាព​ពេញ​និយម​ខ្លាំង​នៅ​ប្រទេស​ជឿនលឿន​លើ​សកលលោក​»​។

នាយិកា​ប្រចាំ​ប្រទេស​នៃ​ក្រុមហ៊ុន CBRE Cambodia អ្នកនាង អាន សុធីតា បាន​ប្រាប់​ថា​ការ​ទាមទារ​ឡើង​ថ្លៃ​ដីធ្លី​នៅ​គ្រប់​ទីកន្លែង​ជុំវិញ​បរិវេណ​ព្រលាន​នោះ​ជា​រឿង​មិន​សមស្រប ព្រោះ​បើ​ឡើង​គួរ​ឡើង​តែ​តំបន់​មាន​ហេដ្ឋារចនាសម្ព័ន្ធ​ធំៗ ឬ​តំបន់​អាច​សាងសង់​មជ្ឈមណ្ឌល​ពាណិជ្ជកម្ម​បាន​។ អ្នកនាង​បន្ត​ថា​គម្រោង​នេះ​វា​ត្រូវការ​ពេលវេលា​នឹង​ចំណាយ​ពេល​ចន្លោះ​ពី​ ៥ ​ទៅ​ ១០ ​ឆ្នាំ​ទៀត​ទើប​អាច​សាងសង់​បញ្ចប់​។

អ្នកនាង សុធីតា ថ្លែង​ថា៖ «​ទីតាំង​ជិត​ព្រលាន​យន្តហោះ​មិន​សូវ​សមស្រប​សម្រាប់​អភិវឌ្ឍ​លំនៅឋាន​ទេ​ដោយសារ​វា​មាន​សំឡេង​រំខាន​ពី​យន្តហោះ​ឡើង​ចុះ​»​។

អ្នកនាង​បន្ត​ថា​គម្រោង​ព្រលាន​យន្តហោះ​ថ្មី​នេះ​មាន​ទាំង​រឿង​វិជ្ជមាន និង​មិន​សូវ​វិជ្ជមាន​។ វិជ្ជមាន​ត្រង់​ថា​មាន​ការ​សាងសង់​ហេដ្ឋារចនាសម្ព័ន្ធ​ដូចជា​ផ្លូវ​ទឹក និង​អគ្គិសនី​ជាដើម ចំណែក​ផល​អវិជ្ជមាន​គឺ​តំបន់​ជុំវិញ​ព្រលាន​យន្តហោះ​នឹង​រង​ការ​រំខាន​ដោយសារ​សំឡេង​នៃ​ការ​ឡើង​ចុះ​នៃ​យន្តហោះ និង​មិន​អាច​សាងសង់​អគារ​ខ្ពស់ៗ​បាន​។

Source From : Phnom Penh Post

 

Latest News

ដោយដែន ចែងចាំង ​ភ្នំពេញ: តម្រូវការការងារក្នុងវិស័យសំណង់ និងអចលនទ្រព្យបានកើនឡើងខ្ពស់ស្របពេលការរីកចម្រើនលើវិស័យសំណង់...
ដោយ គង់ សូរិយា ​ភ្នំពេញ: ខេត្តភូមិភាគឥសាន្តប្រទេស...
ដោយវុត្ថា យោងតាមការទិន្ន័យផ្លូវការរបស់មន្ត្រីរដ្ឋាភិបាលចិន បានបង្ហាញនៅថ្ងៃអង្គារិ៍នេះ ថា...

LATEST EXCLUSIVE LISTING

Land For Sale
Chroy Changva,Russey Keo
USD 1,090,000.00
Land For Sale
Prek Leap,Russey Keo
USD 850,000.00
Land For Rent
Prek Leap,Russey Keo
USD 1,600.00/Month
Villa For Sale
Niroth,Meanchey
USD 205,000.00
Villa For Sale
Chroy Changva,Russey Keo
USD 225,800.00

CVEA MEMBERS