Olympia City កំពុង​ឆ្ពោះ​ទៅ​មុខ​យ៉ាង​ស្ងៀមស្ងាត់

Languages

banner realestate

 Axis Residences

KHMER CAPITAL MICROFINANCE INSTITUTION PLC

vtrust

SurinPhumi – Eco-Green Community

 
អគារ​ខុនដូ​នៅ​ផ្នែក​ខាង​មុខ​នៃ​គម្រោង Olympia City ដែល​បាន​បើក​ឲ្យ​អតិថិជន​ចូល​ស្នាក់នៅ ។ ស្រេង ម៉េងស្រ៊ុន

ផែនការ​នៃ​ការ​សាងសង់​អគារ​ខ្ពស់​ជាង​គេ​របស់​គម្រោង Olympia City ដែល​ស្ថិត​នៅ​ភាគ​ខាង​ជើង​នៃ​ពហុកីឡដ្ឋាន​ជាតិ​អូឡាំពិក​នា​ពេល​នេះ​អាច​នឹង​មាន​ការ​ផ្លាស់ប្តូរ​ខ្លះ ខណៈ​ការ​សាងសង់​គ្រឹះ​បាត​ខាង​ក្រោម​នឹង​ត្រូវ​បញ្ចប់​ក្នុង​ពេល​ឆាប់ៗ​ខាង​មុខ​នេះ​។

ប្រធាន​គ្រប់គ្រង​គម្រោង Olympia City នៃ​ក្រុមហ៊ុន OCIC លោក ម៉េង ចំរើន បាន​ប្រាប់ ប៉ុស្តិ៍ អចលនទ្រព្យ តាម​ទូរស័ព្ទ​កាលពី​សប្តាហ៍​កន្លង​មក​ថា រហូត​មក​ទល់​ពេល​នេះ​ការ​សាងសង់​គម្រោង Olympia City ទាំង​មូល​បាន​បញ្ចប់​ប្រមាណ​ ៧០ ​ភាគរយ​ហើយ​ដោយ​បច្ចុប្បន្ន​ក្រុមហ៊ុន​កំពុង​ត្រៀម​បញ្ចប់​ការ​សាងសង់​គ្រឹះ​ខាង​ក្រោម​នៃ​អគារ​កម្ពស់​ ៦៥ ​ជាន់ (​អគារ​ខ្ពស់​ជាងគេ​) ​នៃ​គម្រោង​នេះ​។

លោក​បន្ត​ថា​ ដោយសារ​បញ្ហា​ទីផ្សារ​នៅ​ពេល​នេះ​ថ្នាក់​ដឹកនាំ​ក្រុមហ៊ុន​កំពុង​ពិចារណា​ក្នុង​ការ​កាត់​បន្ថយ​កម្ពស់​អគារ​ពី​ ៦៥ ​ជាន់​មក​នៅ​ត្រឹម​ ៤៥ ​ជាន់​វិញ ប៉ុន្តែ​សម្រាប់​ការ​សាងសង់​គ្រឹះ​ខាង​ក្រោម​សម្រាប់​អគារ​នេះ​គឺ​ធ្វើ​សម្រាប់​ ៦៥ ​ជាន់​ដដែល​។

លោក​បាន​និយាយ​ថា៖ «​អ្នក​កាន់​ផ្នែក​ទីផ្សារ​របស់​គម្រោង Olympia City បាន​លើក​ឡើង​ថា​ក្រុមហ៊ុន​មិន​គួរ​ចំណាយ​ប្រាក់​ដ៏ច្រើន​ដើម្បី​សាងសង់​អគារ​មេ​ក្នុង​គម្រោង​ដែល​មាន​កម្ពស់​រហូត​ដល់​ ៦៥ ​ជាន់​នោះ​ទេ​»​។ លោក​បន្ត​ថា ៖ «​ថ្នាក់​ដឹកនាំ​ក្រុមហ៊ុន​កំពុង​ស្ថិត​នៅ​ក្នុង​ការ​សម្រេច​ចិត្ត​នៅ​ឡើយ​ទាក់ទង​នឹង​កម្ពស់​អគារ​នេះ​ថា តើ​គួរ​សង់​កម្ពស់​ ៦៥ ​ជាន់ ឬ​ ៤៥ ​​ជាន់​»​។

គម្រោង Olympia City ស្ថិត​នៅ​ចំណុច​ប្រសព្វ​នៃ​ផ្លូវ​ជាច្រើន​ដូចជា ផ្លូវ​ឧកញ៉ា​ទេពផន និង​មហាវិថី​ហ្សាលដឺហ្គោល ជាដើម​។ គម្រោង​នេះ​ស្ថិត​នៅ​ក្នុង​សង្កាត់​វាលវង់ ខណ្ឌ​ ៧ ​មករា រាជធានី​ភ្នំពេញ​។

លោក ម៉េង ចំរើន បាន​ប្រាប់​ទៀត​ថា​កាលពី​ចុង​ឆ្នាំ​មុន​ក្រុមហ៊ុន​បាន​អនុញ្ញាត​ឲ្យ​ម្ចាស់​លំនៅឋាន​ក្នុង​អគារ​ខុនដូ និង Shop House ដែល​ស្ថិត​នៅ​អគារ​ខាង​មុខ​ចំនួន ​៤ ​នៃ​គម្រោង​នេះ​ (C1, C2, C3 និង C4) ចូល​ស្នាក់​នៅ​ហើយ​។

ក្នុង​គម្រោង Olympia City មាន​អគារ​សរុប​ចំនួន​ ១៣ (​អគារ​ខុនដូ អគារ​កម្ពស់​ ៦៥ ​ជាន់​រួម​ជាមួយ​ផ្សារ​ទំនើប​)​។ ផ្សារ​ទំនើប​ដែល​ដាក់​ឈ្មោះ Olympia Plaza គ្រោង​នឹង​បើក​ដំណើរការ​នៅ​ចុង​ត្រីមាស​ទី​ ៣ ឆ្នាំ​ ២០១៨ នេះ​ដោយ​មាន​ទំហំ​ជាង​ ១៦០០០ ​ម៉ែត្រការ៉េ​សម្រាប់​ដំណាក់កាល​ទី​ ១ ដែល​មាន​កម្ពស់​ ៦ ​ជាន់​។

ប្រធាន​គម្រោង​ដែល​មាន​ជំនាញ​វិស្វកម្ម​រូប​នេះ​ក៏​បាន​ប្រាប់​ឲ្យ​ដឹង​ពី​លក្ខណៈ​ពិសេស​នៃ​គម្រោង​នេះ​ដែរ​ថា​ជាមួយ​នឹង​ការ​ផ្តល់​បែប​ផែន​ជីវិត​រស់នៅ​ប្រកប​ដោយ​ផាសុកភាព ក្រុម​ស្ថាបត្យករ​ខ្មែរ និង​បរទេស​ក៏​បាន​ជ្រើសរើស​ជាន់​ទី​ ៥ ​នៃ​អគារ​ទាំងអស់​ក្នុង​គម្រោង​ទាំង​មូល​ដើម្បី​ធ្វើ​ជា​កន្លែង​តភ្ជាប់​គ្នា​ពី​អគារ​មួយ​ទៅ​អគារ​មួយ និង​ភ្ជាប់​ទៅ​ផ្សារ​ទំនើប​ដោយ​នៅ​ជាន់​ទី​ ៥ នេះ​ក៏​មាន​ក្លិប​កីឡា សួនច្បារ​លើ​អាកាស​អាង​ហែល​ទឹក សាលារៀន​អន្តរជាតិ ភោជនីយដ្ឋាន និង​កន្លែង​កម្សាន្ត​នានា​ជាច្រើន​។ គម្រោង​នេះ​ត្រូវ​បាន​សាងសង់​ឡើង​ដោយ​មាន​កម្រិត​ការពារ​គ្រោះ​រញ្ជួយ​ដី​ ៥ ​រិកទ័រ​ផង​ដែរ​។

កញ្ញា តាក់ សុភី ប្រធាន​ផ្នែក​គ្រប់គ្រង​អចលនទ្រព្យ​នៃ​គម្រោង Olympia City បាន​ឲ្យ​ដឹង​ថា​រហូត​មក​ទល់​ពេល​នេះ​មាន​ម្ចាស់​លំនៅឋាន​ជាង​​ ២០ ​ភាគរយ​ហើយ​ដែល​បាន​ចូល​មក​ស្នាក់នៅ និង​ប្រកប​អាជីវកម្ម​ក្នុង​គម្រោង​នេះ​។

កញ្ញា​និយាយ​ថា៖ «​អតិថិជន​ចូល​ស្នាក់​នៅ​ក្នុង​គម្រោង​នេះ​មាន​ចម្រុះ​ទាំង​ជនជាតិ​ខ្មែរ និង​ជនបរទេស​។ ខ្ញុំ​គិត​ថា​នៅ​ពេល​ផ្សារ​ទំនើប​សាងសង់​រួច​នឹង​មាន​ម្ចាស់​លំនៅឋាន​ជាច្រើន​ចូល​មក​ស្នាក់នៅ​»​។ កញ្ញា​បន្ត​ថា៖ «​លំនៅឋាន​សរុប​នៃ​គម្រោង Olympia City ទាំង​មូល​ខ្ញុំ​មិន​ដឹង​ច្បាស់​នោះ​ទេ ប៉ុន្តែ​បើ​គិត​តែ​លំនៅឋាន​ចំនួន​ ៤ ​អគារ​ដែល​បាន​អនុញ្ញាត​ឲ្យ​អតិថិជន​ចូល​ស្នាក់​នៅ​មាន​ចំនួន​ ១ ៥៨៨ ​យូនីត​។

Olympia City បាន​ចាប់​ផ្តើម​បើក​ការដ្ឋាន​សាងសង់​កាលពី​ឆ្នាំ​ ២០១២ លើ​ផ្ទៃដី​ជាង​​ 6 ​ហិកតា​ដែល​ជា​ដី​ជួល​ពី​រដ្ឋ​មាន​រយៈពេល​ ៩៩ ​ឆ្នាំ​។ គម្រោង​នេះ​គ្រោង​នឹង​ចំណាយ​ប្រាក់​វិនិយោគ​ប្រមាណ​ជាង​ ៥០០ ​លាន​ដុល្លារ​អាមេរិក​សម្រាប់​ការ​សាងសង់​អគារ​ដោយ​មិន​ទាន់​គិត​បញ្ចូល​តម្លៃ​ដី​នោះ​ទេ​។ នេះ​បើ​តាម​លោក ទូច សំណាង អគ្គនាយករង​ក្រុមហ៊ុន OCIC ដែល​ជា​ក្រុមហ៊ុន​វិនិយោគ​គម្រោង​ដ៏ធំ​មួយ​នេះ​។

ប្រធាន​សមាគម​អ្នក​វាយតម្លៃ និង​ភ្នាក់ងារ​អចលនវត្ថុ​កម្ពុជា​លោក គីម ហ៊ាង បាន​និយាយ​ថា​បើ​ប្រៀបធៀប​គម្រោង​នេះ​ជាមួយ​គម្រោង​មួយ​ចំនួន​នៅ​ប្រទេស​ម៉ាឡេស៊ី ឬ​សិង្ហបុរី​នោះ​គឺ​គម្រោង​នេះ​មិន​អាច​ប្រៀបធៀប​ជាមួយ​គេ​បាន​ឡើយ ប៉ុន្តែ​ប្រសិន​បើ​គិត​តែ​នៅ​ក្នុង​ប្រទេស​កម្ពុជា Olympia City គេ​អាច​និយាយ​ថា​ជា​គម្រោង​គំរូ​មួយ​ដែល​ផ្ទះ​នៅ​ក្នុង​គម្រោង​នេះ​លក់​ក្នុង​តម្លៃ​សមរម្យ​នៅ​ពេល​ចាប់ផ្តើម​សាងសង់​ភ្លាមៗ ប៉ុន្តែ​តម្លៃ​បច្ចុប្បន្ន​បាន​ឡើង​ ១ ​គុណ​នឹង​ ២ ​រួច​ទៅ​ហើយ​ដោយសារ​គម្រោង​នេះ​ស្ថិត​នៅ​តំបន់​ពាណិជ្ជកម្ម​កណ្តាល​រាជធានី​ភ្នំពេញ​។

លោក​បាន​អះអាង​ថា៖ «​គម្រោង​នេះ​ស្ថិត​នៅ​ទីតាំង​ដ៏ល្អ ប៉ុន្តែ​ភាព​ជោគជ័យ​របស់​គម្រោង​មួយ​គឺ​មិនមែន​អាស្រ័យ​តែ​ទៅ​លើ​ការ​សាងសង់​រួចរាល់​នោះ​ទេ​ដោយ​ភាព​ជោគជ័យ​របស់​គម្រោង​មួយ​គឺ​ពេល​សាងសង់​ចប់​មាន​អ្នក​ចូល​ទៅ​ស្នាក់នៅ​ចាប់​ពី​ ៥០ ​ភាគរយ​ឡើង​ទៅ​»​។

នៅ​ពេល​សួរ​ថា តើ​ជា​ទស្សនៈ​របស់​លោក​ក្រុមហ៊ុន OCIC គួរ​រក្សា​កម្ពស់​អគារ​មេ​នៃ​គម្រោង​នេះ​ឲ្យ​នៅ​ ៦៥ ​ជាន់​ដដែល​ដែរ​ឬ​ទេ​? តើ​វា​សមស្រប​សម្រាប់​សេដ្ឋកិច្ច​សង្គម​របស់​កម្ពុជា​ឬ​អត់​? លោក គីម ហ៊ាង បាន​បញ្ជាក់​ថា៖ «៤៥ ឬ​ ៦៥ ​ជាន់​មិន​សំខាន់​ទេ តែ​អ្វី​ដែល​សំខាន់​នោះ​គឺ​ទីតាំង​សាងសង់​សមស្រប ឬ​អត់​? សម្រាប់​ខ្ញុំ​គិត​ថា បើ​ក្រុមហ៊ុន​មាន​លុយ​គ្រប់គ្រាន់​សម្រាប់​សាងសង់​រហូត​ដល់​ចប់​ដោយ​មិន​ចាំបាច់​ពឹង​ផ្អែក​លុយ​ពី​អ្នក​ទិញ​គម្រោង​នេះ​គួរ​សាងសង់​ឲ្យ​ដល់​កម្ពស់​ ៦៥ ​ជាន់​»​។

លោក​បាន​បន្ត​​ថា៖ «​សម្រាប់​ខ្ញុំ​គិត​ថា​ស្ថានភាព​នាពេល​នេះ​វា​មិន​ត្រូវ​ទេ តែ​សម្រាប់​រយៈពេល​​ ៥ ​ឆ្នាំ​ខាង​មុខ​អគារ​កម្ពស់​ ៦៥ ​ជាន់​នេះ​នឹង​មិន​មាន​បញ្ហា​នោះ​ឡើយ​សម្រាប់​ទីផ្សារ​»​។

គម្រោង​អគារ​មេកម្ពស់​ ៦៥ ​ជាន់​នេះ​គ្រោង​នឹង​ប្រើប្រាស់​សម្រាប់​ជា​ការិយាល័យ​ជួល​សណ្ឋាគារ​កម្រិត​ផ្កាយ​ ៥ អា​ផាត​មិន ភោជនីយដ្ឋាន និង​កន្លែង​សម្រាប់​គយគន់​ទិដ្ឋភាព​នៃ​រាជធានី​ភ្នំពេញ​ទាំង​មូល​៕

Source From : Property Area

 

Latest News

ដោយដែន ចែងចាំង ​ភ្នំពេញ: តម្រូវការការងារក្នុងវិស័យសំណង់ និងអចលនទ្រព្យបានកើនឡើងខ្ពស់ស្របពេលការរីកចម្រើនលើវិស័យសំណង់...
ដោយ គង់ សូរិយា ​ភ្នំពេញ: ខេត្តភូមិភាគឥសាន្តប្រទេស...
ដោយវុត្ថា យោងតាមការទិន្ន័យផ្លូវការរបស់មន្ត្រីរដ្ឋាភិបាលចិន បានបង្ហាញនៅថ្ងៃអង្គារិ៍នេះ ថា...

LATEST EXCLUSIVE LISTING

Villa For Rent
Niroth,Meanchey
USD 600.00/Month
Shop For Rent
Niroth,Meanchey
USD 700.00/Month
Land For Sale
Chroy Changva,Russey Keo
USD 1,090,000.00
Land For Sale
Prek Leap,Russey Keo
USD 850,000.00
Land For Rent
Prek Leap,Russey Keo
USD 1,600.00/Month

CVEA MEMBERS