ទស្សន​វិស័យ​របស់​ស្ថាបត្យករ​ជំនាន់​ក្រោយ​ល្បី​មួយ​រូប

Languages

banner realestate

 Axis Residences

KHMER CAPITAL MICROFINANCE INSTITUTION PLC

vtrust

SurinPhumi – Eco-Green Community

 
លោក ហ៊ុន ចាន់​សាន ​អនុប្រធាន​សមាគម​ស្ថាបត្យករ​កម្ពុជា (CSA) ។ រូបថត សហការី

ខណៈ​ពេល​ដែល​ឧស្សាហកម្ម​សំណង់​កំពុង​មាន​សម្ទុះ​អភិវឌ្ឍ​យ៉ាងខ្លាំង វិស័យ​ស្ថាបត្យកម្ម​កម្ពុជា ក៏មាន​កា​រវិ​វ​ត្តរីក​​ចម្រើន​​ផង​ដែរ កាល​ពី​ដើម​សប្តាហ៍​នេះ លោក មឿ​ន ញាណ ការី​និពន្ធ​ភ្នំពេញ​ប៉ុស្តិ៍​អចលនទ្រព្យ បានធ្វើការ​ពិភាក្សា​ជាមួយលោក ហ៊ុន ចាន់​សាន ជាស្ថាបត្យ​ករ​វ័យក្មេង​មាន​កេរ្តិ៍ឈ្មោះ​ល្បី និង​ជា​អនុប្រធាន​សមាគម​ស្ថាបត្យករ​កម្ពុជា (CSA) ដើម្បី​ពន្យល់​អំពី​ទស្សន​វិស័យ ការ​រីក​ចម្រើន និង​ដំណើរ​វិវត្ត​នៃ​វិស័យ​ស្ថាបត្យកម្ម​ខ្មែរ​នៅក្នុង​សង្គម​កម្ពុជា​សព្វ​ថ្ងៃ​។

ខាងក្រោម​នេះគឺជា​ខ្លឹមសារ​នៃ​បទ​សម្ភាស​ខ្លះៗ ដូច​ត​ទៅ ៖

តើ​អ្វី​ខ្លះទៅ​ដែល​លោក​បាន​ពិនិត្យ​ឃើញ​មាន​ការ​ផ្លាស់​ប្តូរ​ផ្នែក​ស្ថាបត្យកម្ម​នៅ​ក្នុង​ការ​រស់នៅ​របស់​ប្រជាជន​កម្ពុជា​បច្ចុប្បន្ន​?

បើ​តាម​បទពិសោធ​របស់​ខ្ញុំ ខ្ញុំ​បាន​ទទួល​សំណួរ​បែប​នេះ​ជា​ញយ​ដង​។ ចំ​ណែក​កិច្ច​ការ​យ៉ាង​ច្រើន​ទាក់ទង​ទៅ​លំនៅឋាន និង​ការិយាល័យ ឬ​អគារ​រស់​នៅ គឺមាន​ភាព​ល្អ​ប្រសើរ​ជាង​បច្ចុប្បន្ន​។

តាម​បណ្តា​គម្រោង​លំនៅឋាន​នានា អតិថិជន​តែង​ចង់​បាន​ទីធ្លា​ខាង​ក្រៅ​ធំ​ទូលាយ​ជាង​មុន​ដោយ​សារ​ពួកគេ​ចង់​ផ្សារភ្ជាប់​ជីវិត​រស់នៅ​ផ្នែក​ខាងក្នុង​ទៅនឹង​បរិស្ថាន​ខាង​ក្រៅ ហើយ​ពួកគេ​យល់​ថា ការ​ប្រើ​គ្រឿង​បរិក្ខារ​ដែល​មាន​គុណភាព​ល្អ​ដូចជា​កញ្ចក់​ពីរ​ជាន់​ដើម្បី​ការពារ​សំឡេង​រំខាន និង​កាត់​​បន្ថយ​កម្តៅ​ព្រះអាទិត្យ​ដ៏​ក្តៅ​នៅ​ប្រទេស​កម្ពុជា ជាដើម។

អតិថិជន​មាន​ការ​យល់ដឹង​អំពី​ផលិតផល និង​គុណភាព​នៃ​គ្រឿង​បរិក្ខារ ដោយ​សារ​តែ​ប្រជាជន​កម្ពុជា​បច្ចុប្បន្ន​មាន​ជីវភាព​រស់នៅ​កាន់​តែ​ទំនើប និង​ភាព​មមាញឹក នឹង​​ការងារ​ផង​នោះ គឺ​ពួក​គេ​ក៏​ត្រូវការ​ការ​កម្សាន្ត និង​ការ​សម្រាក​លំហែ​ផងដែរ​។

ចុះ​នៅ​តាម​ការិយាល័យ ឬ​កន្លែង​ធ្វើ​ការ​ងារ​វិញ តើ​មាន​អ្វី​ប្រែ​ប្រួល​ខ្លះ​ដែរ​?

សម្រាប់​ការិយាល័យ ឬ​កន្លែង​ធ្វើ​ការងារ អតិថិជន​ខ្ញុំ​ចង់​បាន​ការ​រចនា និង​រចនា​សម្ព័ន្ធ​របស់​វា គឺ​អាច​ធ្វើ​ឲ្យ​បុគ្គលិក​របស់​ពួកគាត់​អាចធ្វើ​ការ​ប្រាស្រ័យ​ទាក់​រវាង​គ្នា​បាន​ងាយស្រួល និង​អាច​ធ្វើ​ការ​បាន​ច្រើន​ម៉ោង​ជាង​មុន​ជាមួយ​គ្នា​។ “កន្លែង​ធ្វើ​ការ​ងារ​រួម​កាន់តែ​ធំ កន្លែង​ការងារ​ជា​លក្ខណៈ​បុគ្គល​កាន់តែ​តិច​” ហាក់បី​ដូចជា​ទិសដៅ​ថ្មី​នៃ​ផ្នត់​គំនិត​សម្រាប់​កន្លែងធ្វើការ​បើ​ប្រៀបធៀប​ទៅ​នឹង​ការ​ដាក់​ឲ្យ​បុគ្គលិក​អង្គុយ​ធ្វើការ​ទល់​មុខ​គ្នា​ខណ្ឌ​ដោយ​ឡែក​ពីគ្នា​។

ប្រជាជន​កម្ពុជា​មាន​ការ​ប្រាស្រ័យ​ទាក់ទង​គ្នា​ល្អ​ប្រសើរ​ជាង​មុន ដោយ​ពួក​គេ​ធ្វើការ​រួមគ្នា ចេញទៅ​ខាងក្រៅ​រួមគ្នា និង​ធ្វើ​ដំណើរ​កម្សាន្ត​ថ្ងៃ​វិស្សមកាល​ជា​មួយ​គ្នា​ទៀតផង​។

ទាំងនេះ​គឺជា​សម្ព័ន្ធភាព​ដ៏​ល្អ​ក្នុង​ក្រុម​ការងារ​ដែល​ក្រុមហ៊ុន​នានា​ចង់បាន​។ ដូច្នេះ​ហើយ​ពួក​គេ​ច្រើន​តែ​ធ្វើការ​ក្នុង​ការិយាល័យ​បានយូរ​ជាង​មុន ហើយ​ការ​ចេញទៅ​លម្ហែ និង​ការ​ចេញ​ទៅផ្ទះ​ក្រោយពី​ម៉ោង​ការងារ គឺ​មិន​មាន​ភាព​តឹងតែង​ដូច​មុន​នោះទេ​។ បម្រែបម្រួល​នេះ​ក៏​ដោយសារតែ​ភាព​រីកចម្រើន​នៃ​សង្គម​រស់នៅ​ផង រួមទាំង​ការកម្សាន្ត​ផងដែរ​។

តើ​លោក​អាច​ចង្អុល​បង្ហាញ​បានទេ បច្ចុប្បន្ន​នេះ​សំណង់​ថ្មីៗ​ណាខ្លះ ដែល​បានរួម​បញ្ចូល​ស្ថាបត្យកម្ម​ខ្មែរ​?

ជាបឋម ខ្ញុំ​មិន​គិតថា គ្រប់​អគារ​ទាំង​អស់​ត្រូវ​តែ​មាន​រចនាប័ទ្ម​ឬ​វប្បធម៌ ឬ​ក៏​អត្ត​សញ្ញាណ​ខ្មែរ​នោះទេ​។ នេះ​គឺជា​ប្រទេស​កម្ពុជា​ក្នុង​សម័យ​សកល​ភាវូបនីយកម្ម ហើយ​យើង​មិន​ចាំបាច់​រឹត​បន្តឹង​ដោយ​ប្រកាស​ប្រាប់​គេឯង​ថា យើង​ជា​ខ្មែរ​ដើម្បី​រក្សា​អត្តសញ្ញាណ ឬ​សិល្បៈ​ខ្មែរ​នោះទេ។

រចនាប័ទ្ម​ខ្មែរ​ត្រូវបាន​បន្សល់ទុក និង​បន្ត​ប្រើប្រាស់​ចាប់តាំងពី​សម័យ​បុរាណ​រហូត​ដល់​​សម័យ​អង្គរ និង​បន្ត​រហូត​មក​ដល់​ស្ថាបត្យកម្ម​ថ្មីៗ​របស់​ខ្មែរ ក៏​ព្រោះតែ​សង្គម​​របស់​យើង​មាន​ភាព​រីកចម្រើន​ជា​បន្ត​បន្ទាប់ ហើយនឹង​បន្ត​ទៅមុខទៀត​ក្រោម​​​ឥទ្ធិពល​របស់​សាសនា ប្រពៃណី​ទំនៀម​ទម្លាប់ បរិស្ថាន ការ​រស់នៅ​បែប​សម័យ​ថ្មី តម្រូវការ​ថ្មីៗ និង​អ្វីៗ​ដែល​មាន​ផ្តល់​ជូន​ទៅដល់​អតិថិជន​នៅ​លើ​ទីផ្សារ រួមមាន​ទាំង​គ្រឿង​បរិក្ខារ បច្ចេកវិទ្យា​ថ្មីៗ និង​សមស្រប​ទៅ​សម័យ​សកល​ភាវូនីយកម្ម​ផងដែរ​។

បើ​ទោះ​ជា​យ៉ាង​នេះ​ក្តី ខ្ញុំ​ឯកភាព​ថា ស្ថាបត្យកម្ម​ខ្លះ​គប្បី​មាន​រួម​បញ្ចូល​នូវ​ស្ថាបត្យកម្ម​ខ្មែរ និង​លើក​កម្ពស់​ឲ្យ​អគារ​រដ្ឋាភិបាល អគារ​ស្ថាប័ន វិទ្យាស្ថាន និង​រមណីយដ្ឋាន​(​រីសត​)​មាន​រចនាប័ទ្ម​ខ្មែរ។

ខ្ញុំ​ជឿ​ជាក់​ថា អគារ​ស្ថាបត្យកម្ម​ខ្មែរ​កាន់​តែ​ច្រើន​គួរតែ​បង្ហាញ​ខ្លួន​នា​ពេល​បច្ចុប្បន្ន​នេះ ដើម្បី​តំណាង​ឲ្យ​សម័យ​កាល​ដ៏​រុងរឿង​បន្ត​ពី​បុព្វបុរស​របស់​យើង ប៉ុន្តែ​ពេល​នេះ​ក៏​ជា​ពេល​ដែល​យើង​ត្រូវ​ស្វែងរក​អ្វីដែល​ថ្មី សម្រាប់​មនុស្ស​ជំនាន់​ថ្មី​របស់​យើង​ដែរ​។

នៅ​ក្នុង​វិស័យ​សំណង់ និង​ស្ថាបត្យកម្ម​នា​ពេល​បច្ចុប្បន្ន តើ​យើង​គួរ​អភិវឌ្ឍ​ដោយ​របៀប​ណា​?

បច្ចុប្បន្ន​នេះ ប្រទេស​កម្ពុជា​ត្រូវ​ការ​សណ្ឋាគារ​ដើម្បី​ផ្តល់​ជា​កន្លែង​ស្នាក់​នៅ​ដល់​ភ្ញៀវ​ទេសចរ អគារ​ពាណិជ្ជកម្ម​សម្រាប់​ការ​ប្រកប​ជំនួញ​អាជីវកម្ម ផ្សារ​ទំនើប​សម្រាប់​ការដើរ​ទិញ​ទំនិញ ការ​លម្ហែ​កម្សាន្ត និង​ការ​អភិវឌ្ឍ​តាម​តំបន់​ឆ្នេរ​ជាដើម​។ នេះ​ជា​ជីវិត​រស់នៅ​បែប​ថ្មី​របស់​ខ្មែរ​យើង​។

អគារ​ដែល​ល្អ​ត្រូវ​តែ​មាន​​អ្វីដែល​ឆ្លើយតប​ទៅនឹង​តម្រូវការ​ទាំង​នេះយ៉ាងណា​មិញ យើង​ចាំបាច់​ត្រូវ​តែ​យល់ដឹង​អំពី​ច្បាប់​គោល​មួយចំនួន​ដូច​ជា​កត្តា​អាកាសធាតុ​ត្រូពិក​នៅ​កម្ពុជា ស្ថានភាព​ទម្រង់ដី បរិស្ថាន​ជុំវិញ​អគារ និង​​ផាសុកភាព​របស់​អ្នក​ស្នាក់​នៅ រស់នៅ ឬ​ការ​ប្រើ​ប្រាស់​។

ពិភពលោក​បច្ចុប្បន្ន​កំពុង​តែ​ប្រឈម​នឹង​ដំណើរ​សកល​ភាវូប​នីយកម្ម​។ ដូច្នេះ​សំណង់​ស្ថាបត្យកម្ម​ថ្មីៗ​របស់​ខ្មែរ​គួរតែ​ឆ្លើយ​តប​ទៅ​នឹង​ឧបសគ្គ​របស់​ពិភពលោក​ជា​ជាង​ការ​ជាប់ផុង​ជាមួយ​នឹង​ផ្នត់​គំនិត​ពី​អតីតកាល​។

យើង​គប្បី​ត្រូវ​មាន​មោទន​ភាព​ជាមួយនឹង​សមិទ្ធផល​ពី​អតីតកាល​របស់​យើង តែ​ក៏ត្រូវ​ស្វែងរក​អ្វីដែល​ថ្មី​សម្រាប់​ពេលអនាគត​ជានិច្ច​ផងដែរ​៕

Source From : Phnom Penh Post

 

Latest News

LATEST EXCLUSIVE LISTING

Villa For Sale
Niroth,Meanchey
USD 1,100,000.00
Flat House For Sale
Prek Pra,Meanchey
USD 68,000.00
Flat House For Sale
Dangkao,Dangkao
USD 73,000.00
Flat House For Sale
Boeng Keng Kang III,Chamkarmon
USD 295,000.00
Apartment For Sale
Chrang Chamres 1,Russey Keo
USD 168,000.00

CVEA MEMBERS