សំណង់​ខ្ពស់ៗ​នៅ​តែ​បន្ត​សាង​សង់​នៅ​ក្បែរ​តំបន់​បូជនីយដ្ឋាន​សំខាន់ៗ

Languages

banner realestate

 Axis Residences

KHMER CAPITAL MICROFINANCE INSTITUTION PLC

vtrust

SurinPhumi – Eco-Green Community

 
ព្រះ​បរម​រាជវាំង និង​សំណង់​ខ្ពស់ៗ​ដែល​ស្ថិត​នៅ​ភាគ​ខាង​លិច​នៃ​បរិវេណ​ព្រះបរម​រាជវាំង។ មឿន ញាណ

ស្រប​ពេល​រាជធានី​ភ្នំពេញ​មាន​ការ​វិនិយោគ និង​ការ​អភិវឌ្ឍ សម្ទុះ​នៃ​ការ​សាងសង់​សំណង់​អគារ​ទំនើប​ខ្ពស់ៗ​ស្ថិត​នៅ​ក្នុង​តួ​លេខ​មួយ​ដែល​គួរ​ឲ្យ​កត់​សម្គាល់​។ ការ​រីក​ដុះដាល​នូវ​សំណង់​អគារ​នៅ​ក្នុង​ទីក្រុង​ជា​សញ្ញា​អភិវឌ្ឍន៍​មួយ​ប្រកបដោយ​ភាព​ស៊ី​វិល័យ ប៉ុន្តែ​សំណង់​ខ្ពស់ៗ​ទាំងនោះ​ក៏​ជា​ហានិភ័យ​មួយ​ផ្នែក​នៃ​ទេសភាព​ទីក្រុង​។

ទោះបីជា​គម្រោង​អភិវឌ្ឍន៍​សាងសង់​ផ្សារ​ទំនើប និង​អគារ​ស្នាក់នៅ​មួយចំនួន​បាន​ពង្រីង​ទៅ​ជាយ​ទីក្រុង​នាពេល​ថ្មីៗ​នេះ​គម្រោង​សាងសង់​អគារ​ខ្ពស់ៗ​របស់​ក្រុមហ៊ុន​វិនិយោគ​ក៏បាន​អភិវឌ្ឍ​ខ្លួន​នៅ​ចំ​បេះដូង​នៃ​ទីក្រុង ដែល​ស្ថិតនៅក្នុង​លក្ខខណ្ឌ​កំណត់​មួយ​រវាង​កម្ពស់ និង​ចម្ងាយ​ពី​សំណង់​បេតិកភណ្ឌ​នានា ដូចជា​ព្រះបរមរាជវាំង វិមានឯករាជ្យ បូជនីយដ្ឋាន វត្ត​អារាម​ជាដើម​។

លោក​បណ្ឌិត វ៉ាន់ វ៉ាត អ្នក​ឯកទេស​ផ្នែក​នគរូបនីយកម្ម​ទីក្រុង​បាន​ថ្លែង​ថា នៅ​ពេល​ដែល​មាន​ការ​រៀប​ចំ​នគរូបនីយកម្ម​បែប​ទំនើប នៅតាម​ប្រទេស​នីមួយៗ​ត្រូវ​មាន​ការ​គិតគូរ​ច្រើន​ពី​ការ​កំណត់​តំបន់ និង​កម្ពស់​អគារ​នៅ​ក្នុង​តំបន់​នីមួយៗ​ច្បាស់លាស់​ដែរ​។ ជាក់​ស្តែង​នៅ​ក្នុង​រាជធានី​ភ្នំពេញ មាន​ការ​សិក្សា​ជាច្រើន​ឆ្នាំ​មក​ហើយ​ពី​ការ​កំណត់​កម្ពស់​អគារ​ទៅតាម​តំបន់​នីមួយៗ ទៅ​តាម​ផែនទី និង​គម្រោង ដែលជា​សេចក្តី​ព្រាង​របស់​ក្រសួង​រៀបចំ​ដែនដី នគរូបនីយកម្ម និង​សំណង់ ដើម្បី​កំណត់​ជា​បទដ្ឋាន​នេះ​ឡើង ប៉ុន្តែ​វា​មិន​ទាន់​ជា​សេចក្តី​ប្រកាស​ផ្លូវ​ការ​នៅ​ឡើយ​។

តំបន់​មួយ​ចំនួន​នៅ​ជុំវិញ​ព្រះបរមរាជវាំង វិមាន​ឯករាជ្យ តាម​បណ្តាយ​មាត់​ទន្លេ ឬ​ក្បែរ​ស្ពាន​ធំៗ ដែល​ជា​តំបន់​សំខាន់ៗ គេ​តែង​តែ​ស្នើសុំ​បទ​ប្បញ្ញត្តិ​ទាក់ទង​នឹង​ទីកន្លែង​ដើម្បី​សាងសង​ឲ្យ​ស្រប​ច្បាប់​ពីព្រោះ​វា​ជា​តំបន់​ដែល​ប្រជុំ​ដោយ​សំណង់​បេតិកភណ្ឌ​។

លោក​បាន​ឲ្យ​ដឹងថា​ ៖ «​កន្លង​មក​សាលា​រាជធានី​ភ្នំពេញ និង​ក្រសួង​ដែនដី បាន​ប្រើប្រាស់​សេចក្តី​ព្រាង​នេះ ដើម្បី​អនុវត្ត ប៉ុន្តែ​មិន​ទាន់​ជា​ផ្លូវ​ការ និង​ផ្សព្វ​ផ្សាយ​ឲ្យ​បាន​ទូលំ​ទូលាយ​ដល់​អ្នក​វិនិយោគ និង​សាងសង់​នៅឡើយ​ទេ​»​។

លោក​បណ្ឌិត​បន្ត​ថា ពាក់ព័ន្ធ​ទៅ​នឹង​តំបន់​នីមួយៗ​ក្នុង​ទីក្រុង ក្រសួង​មាន​ជា​ប្លង់​មេ​(master plan) ដែល​មាន​ការ​កំណត់​មុខងារ​ត្រឹម​ត្រូវ​ក្នុងការ​ប្រើប្រាស់​ដី ប៉ុន្តែ​មិន​បាន​កំណត់​ពី​កម្ពស់​អគារ​ទេ ដូច្នេះ​តំបន់​ទីប្រជុំជន​ពាណិជ្ជកម្ម​មួយ​ចំនួន​អាច​សាងសង់​បាន​។

លោក​បាន​បង្ហើប​ថា​ ៖ «​ដោយ​សារ​យើង​មិន​បាន​កំណត់​ជាក់លាក់ ការ​អភិវឌ្ឍ​ខ្លះ​អាច​សាងសង់​បាន​អាស្រ័យ​ទៅ​លើ​​ការ​ស្នើរ​សុំ​តាម​លំដាប់​លំដោយ​តាម​ក្រសួង​ជំនាញ​ជាក់ស្តែង​ពី​ម្ចាស់​វិនិយោគ។ ឧទាហរណ៍​ ៖ ការ​សាងសង់​គឺ សិ្ថត​ទៅ​តាម​ស្ថានភាព និង​ការ​វាយ​តម្លៃ​របស់​អ្នក​ជំនាញ​របស់​ក្រសួង​ដែនដី​»​។

យោង​តាម​អនុក្រឹត្យ​៨៦​ស្តីពី​ ៖ «លិខិត​អនុញ្ញាត​សាងសង់​» ក្នុង​មាត្រា​២ របស់​ក្រសួង​រៀបចំ​ដែនដី នគរូបនីយកម្ម និង​សំណង់​បាន​ឲ្យ​ដឹងថា រាល់​សំណង់​ទាំងអស់​នៅក្នុង​ទីក្រុង ឬ​ទី​រួម​ខេត្ត ត្រូវ​ស្ថិត​នៅ​ក្រោម​ការ​អនុញ្ញាត​សាងសង់​របស់​ក្រសួង​។ សំណង់​ថ្មី​ទាំង​អស់​ដែល​ចង់​កសាង​ឡើងវិញ ការ​ពង្រីក និង​ការ​បន្ថែម​ជាន់​លើ​អាគារ​ដែលមាន​ស្រាប់​នឹង​ត្រូវ​អនុវត្ត និង​គោរព​តាម​លិខិត​អនុញ្ញាត​សាងសង់​ផងដែរ​។

លោក​ក៏​បាន​លើក​ឡើង​ពី អនុក្រឹត្យ​លេខ​៨៦​ស្តីពី «​លិខិត​អនុញ្ញាត​សាងសង់» ថា ទាក់ទង​ទៅនឹង​បទ​ប្បញ្ញា​ត្តិ​បច្ចេកទេស គឺ​ពាក់ព័ន្ធ​ទៅនឹង​ការ​ស្នើរ​សុំ​ការសាងសង​ដូចជា​សេវា​សំណង់ និង​ស្តង់ដារ​សំណង់​ស្រប​ទៅ​នឹង​ការ​អភិវឌ្ឍ​ប្រទេស​។ វា​មិនមែន​ជា​បញ្ហា​អ្វី​ឡើយ​សម្រាប់​ការ​អភិវឌ្ឍ សំខាន់​វា​អាស្រ័យ​ទៅ​នឹង​តំបន់​នីមួយៗ​ថា​ តើ​ជា​តំបន់​អភិរក្ស ឬ​តំបន់​អភិវឌ្ឍន៍​ពាណិជ្ជកម្ម​»​។

ប៉ុន្តែ​លោក​បណ្ឌិត​បាន​ប្រាប់​ថា អនុក្រឹត្យ​នេះ​មិន​ទាន់​បាន​កែ​សម្រួល​ឲ្យ​ឆ្លើយតប​គ្រប់​ជ្រុងជ្រោយ​ទៅ​នឹង​ការ​អភិវឌ្ឍ​បច្ចុប្បន្ន​នៅ​ឡើយ​ទេ ដូច្នេះ​ទាម​ទារ​ឲ្យ​មុននឹង​ធ្វើការ​សាងសង់ ត្រូវ​ធ្វើ​ការ​ស្នើ​សុំ​ជាក់ស្តែង​ទៅ​ក្រុម​ការងារ​ជំនាញ​មើល​ឡើង​វិញ​នូវ​អ្វីដែល​មិន​ទាន់​មាន​ក្នុង​អនុក្រឹត្យ​។

លោក​បាន​បន្ថែម​ថា​ ៖ «​ដោយ​សារ​មិន​មាន​ការអនុវត្ត​សេចក្តី​ប្រកាស​ជា​ផ្លូវ​ការ យើង​ឃើញ​មាន​អគារ​ខ្ពស់ៗ​បាន​សាងសង់​នៅ​ក្បែរ​មាត់​ទន្លេ ដែល​ផ្ទុយ​ពី​ការ​កំណត់​របស់​អនុក្រឹត្យ​សាងសង់​តម្រូវ​ឲ្យ​មាន​ចម្ងាយ​៥០​ម៉ែត្រ ពី​ច្រាំង​ទន្លេ ប៉ុន្តែ​សំណង់​ខ្លះ​បាន​កើត​មុន និង​ក្រោយ ដូច្នេះ​អាជ្ញាធរ​ត្រូវ​មាន​ការ​ពិនិត្យ​ឲ្យ​មែនទែន​ពី​ជំនាញ​ដូចជា​សំណង់​កាស៊ីណូ​ណាហ្គា​វើល​ថ្មី ដែលមាន​ប្រវែង​វែង​បាំង​ទេសភាព​ខាងក្រោយ និង​ធ្វើ​ឲ្យ​ខ្យល់​មិន​អាច​ចេញចូល​តំបន់​ក្បែរ​នោះបាន​»​។

លោក​ផ្ទាល់​មាន​ការ​ព្រួយបារម្ភ​ពី​អគារ​ខ្ពស់ៗ​ដែល​នៅ​ក្បែរ​មាត់​ទន្លេ ឬ​ព្រែក ដែល​មិន​គោរព​ទៅ​តាម​ការ​កំណត់ និង​សណ្ឋាន​ដី ពីព្រោះ​វា​អាច​ប៉ះពាល់​ទៅ​នឹង​បញ្ហា​សុវត្ថិភាព​នៃ​សំណង់​(បាក់​ស្រុត​) ប៉ះពាល់​ទេសភាព​ទីក្រុង​ដែល​អាច​បាំង​នូវ​ខ្យល់​ទន្លេ និង​ការ​បាត់បង់​សោភ័ណភាព​ទីក្រុង​។

«​យើង​គួរ​ព្យាយាម​រក្សា​ទេសភាព និង​បរិយាកាស​នៅ​តំបន់​ជិត​ព្រះបរម​រាជវាំង ពីព្រោះ​វា​ជា​តំបន់​ដែល​មាន​អំណោយផល​ធម្មជាតិ​សម្រាប់​ទីក្រុង​នៃ​ប្រទេស​កម្ពុជា ដែល​ជា​កន្លែង​ទេសចរណ៍​ត្រូវការ និង​ទាមទារ​ឲ្យ​មានការ​ផ្សព្វផ្សាយ​យល់​ដឹង​ទាំង​អស់​គ្នា​ទាក់ទង​ទៅនឹង​បទ​ប្បញ្ញា​ត្តិ ដែល​មាន​ការ​ឯកភាព​គ្នា​»​។

ទន្ទឹមនឹង​ភាព​ខ្វះខាត​ផ្នែក​បច្ចេកទេស និង​គុណភាព​អគារ លោក វ៉ាត ក៏​បាន​សរសើរ​អគារ​មួយ​ចំនួន ដែល​មាន​ការ​ឌីហ្សាញ​ដោយ​រក្សា​ទុក​ចន្លោះ​ខ្យល់​ចេញ​ចូល និង​គិតពី​ទីធ្លារ​សួន​ច្បារ និង​ទីធ្លា​រហាត់​កីឡា​។

លោក សន សៀប ស្ថាបនិក និង​ជា​ប្រធាន​គ្រប់គ្រង​ក្រុមហ៊ុន Key Real Estate បាន​ប្រាប់​កាសែត​ភ្នំពេញ​ប៉ុស្តិ៍ អចលនទ្រព្យ​ថា អនុក្រឹត្យ​របស់​ក្រសួង​រៀបចំ​ដែនដី នគរូបនីយកម្ម និង​សំណង់ បាន​កំណត់​ទីតាំង​របស់​អគារ ប៉ុន្ដែ​កម្ពស់​អគារ​នេះ​មិន​ទាន់​បាន​ប្រកាស​ជា​ផ្លូវ​ការ​នៅ​ឡើយ​។ រហូត​មក​ដល់​ពេល​នេះ​ក្រសួង​បាន​បង្ហាញ​ប្លង់​កម្ពស់​នៅ​ម្តុំ​ព្រះបរម​រាជវាំង វិមាន​ឯករាជ្យ អាកាស​យានដ្ឋាន ដែល​ជា​កន្លែង​មិន​ត្រូវ​បាន​អនុញ្ញាត​ឱ្យ​សាងសង់​អគារ​ខ្ពស់ៗ​។

លោក​បាន​មាន​ប្រសាសន៍​ថា​ ៖ «ការ​សាងសង់​ត្រូវតែ​ស្ថិត​នៅ​ចន្លោះ​ពី ៣០០ ទៅ៥០០​ម៉ែត្រ ពី​កន្លែង​សម្គាល់​ទាំង​នោះ»​។

លោក សេង ឡូត មន្ត្រី​អ្នក​នាំ​ពាក្យ​ក្រសួង​រៀបចំ​ដែនដី នគរូបនីយកម្ម និង​សំណង់ ពុំ​អាច​សុំ​ធ្វើការ​អធិប្បាយ​ពន្យល់​បាន​ទេ​នៅ​ក្នុង​ដើម​សប្តាហ៍​នេះ ប៉ុន្តែ​លោក​ធ្លាប់​បាន​ប្រាប់​កាសែត​ភ្នំពេញ ប៉ុស្តិ៍​អចលនទ្រព្យ កាលពី​ខែសីហា​ឆ្នាំ​២០១៦​ថា [​រហូត​មក​ដល់​ពេល​បច្ចុប្បន្ន​នេះ​ក្រសួង​នៅ «​ពុំទាន់​មាន​ច្បាប់​» ឬ​សារាចរ​ណែនាំ​ដល់​ការ​សាងសង់​សំណង់​ថ្មីៗ ដែល​មាន​ទីតាំង​នៅ​ក្បែរៗ​ទីតាំង​សំខាន់ៗ រួម​ទាំង​រមណីយដ្ឋាន បូជនីយដ្ឋាន ទីតាំង​ឬ​សំណង់​បេតិភណ្ឌ​នៅ​ឡើយ​ទេ «​ប៉ុន្តែ​ក្រសួង​បាន​រៀបចំ​ការ​ប្រជុំ​ឯកភាព​គ្នា​ជាមួយ​អាជ្ញាធរ​រាជធានី​ភ្នំពេញ​» និង​អ្នក​ពាក់ព័ន្ធ​រួច​ហើយ​កាល​ពី​ពេល​កន្លង​មក​]៕

សំណង់​អគារ​ខ្ពស់​ដែល​ស្ថិត​នៅ​ក្បែរ​បូជនីយដ្ឋាន​សំខាន់ៗ​

​ថ្មីៗ​នេះ​ក្រុមហ៊ុន​វិនិយោគ​ឯកជន«4Season Construction» ដែល​មាន​មូលដ្ឋាន​នៅ​ប្រទេស​ចិន បាន ប្រកាស​ពី​គម្រោង​សង់​ខុន​ដូ​កម្ពស់​៣៣​ជាន់ ថ្មី​មួយ​នៅ​កណ្តាល​រាជធានី​ភ្នំពេញ នៅ​បណ្តោយ​ផ្លូវ​លេខ​២៩៤ កែង​នឹង​មហាវិថី​ព្រះ​នរោត្តម ដែល​មាន​ចម្ងាយ​ប្រហែល​២៥០​ម៉ែត្រ ពី​វិមាន​ឯករាជ្យ​។ យោងតាម​សេចក្តី​ប្រកាស​ព័ត៌មាន​ក្នុង​សប្តាហ៍​នេះ គម្រោង​ខុន​ដូ​ដែល​បង្ហាញ​ពី​លទ្ធភាព​នឹង​បញ្ចប់​នៅ​ចុង​ឆ្នាំ​២០២០។ តើ​អគារ​ខុន​ដូ​ដែល​មាន​កម្ពស់​៣៣​ជាន់ នេះ​អាច​សាងសង់​បាន​ទេ ខណៈ​មាន​ទីតាំង​នៅ​ក្បែរ​តំបន់​បូជនីយដ្ឋាន​វិមាន​ឯករាជ្យ​?

កាលពី​ឆ្នាំ​២០១៣ អគារ​សណ្ឋាគារ Landscape ធ្លាប់​ត្រូវ​បាន​សាលា​រាជធានី​ភ្នំពេញ​ប្រកាស​ឲ្យ​វាយ​ចោល​ជាន់​ខ្លះ ដោយ​សារ​តែ​មាន​ទីតាំង​ខ្ពស់​នៅ​ក្បែរ​ព្រះបរម​រាជវាំង​។ ប៉ុន្តែ​សព្វ​ថ្ងៃ​នេះ មាន ការ​សាងសង់​អគារ​ខ្ពស់​បន្ថែម​ថ្មី​មួយ ទៀត​របស់​ក្រុមហ៊ុន​ឯកជន​នៅក្បែរ​ទីនោះ។ ករណី​នេះ មហាជន​បាន​ចោទ​ជា​សំណួរ​ថា តើ​ក្រសួង​រៀបចំ​ដែនដី នគរូបនីយកម្ម និង​សំណង់ គួរ​មាន​វិធានការ​យ៉ាង​ដូច​ម្តេច​?

បើ​តាម​ប្រសាសន៍​របស់​លោក ឡូត កាលពី​ខែ​សីហា ឆ្នាំ​២០១៦​ដដែល​បាន​ឲ្យ​ដឹង​ថា​៖ [«​ចំពោះ​ព្រះបរម​រាជវាំង ត្រូវ​បាន​កំណត់​ពី​អ័ក្ស​របស់​ព្រះបរម​រាជវាំង ក្នុង​កាំ​រង្វង់​៣០០​ម៉ែត្រ​នោះ គឺ​អនុញ្ញាត​ឲ្យ​ការ​សាងសង់​[​សំណង់​ថ្មី​]​មាន​កម្ពស់​តែ​១៤​ម៉ែត្រ​ទេ​។ ចំណែក​ក្នុង​ចន្លោះ​កាំ​រង្វង់​លើសពី ៣០០​ម៉ែត្រ ដល់​៥០០​ម៉ែត្រ អនុញ្ញាត​ឲ្យ​មាន​កម្ពស់​តែ ២៥​ម៉ែត្រ​តែ​ប៉ុណ្ណោះ​»]៕

Source From : Khmer Post

 

Latest News

ដោយដែន ចែងចាំង ​ភ្នំពេញ: តម្រូវការការងារក្នុងវិស័យសំណង់ និងអចលនទ្រព្យបានកើនឡើងខ្ពស់ស្របពេលការរីកចម្រើនលើវិស័យសំណង់...
ដោយ គង់ សូរិយា ​ភ្នំពេញ: ខេត្តភូមិភាគឥសាន្តប្រទេស...
ដោយវុត្ថា យោងតាមការទិន្ន័យផ្លូវការរបស់មន្ត្រីរដ្ឋាភិបាលចិន បានបង្ហាញនៅថ្ងៃអង្គារិ៍នេះ ថា...

LATEST EXCLUSIVE LISTING

Land For Sale
Chroy Changva,Russey Keo
USD 1,090,000.00
Land For Sale
Prek Leap,Russey Keo
USD 850,000.00
Land For Rent
Prek Leap,Russey Keo
USD 1,600.00/Month
Villa For Sale
Niroth,Meanchey
USD 205,000.00
Villa For Sale
Chroy Changva,Russey Keo
USD 225,800.00

CVEA MEMBERS