ស្តាប់​អ្នក​រស់នៅ​ខុនដូ​ទំនើប​ជំនាន់​ទី​ ១ ​នៅ​ភ្នំពេញ

Languages

banner realestate

CVEA-Website-homepage-ad

591

vtrust

premuim housing

 
ទិដ្ឋភាព​ទីក្រុង​ភ្នំពេញ​នៅ​ម្តុំ​កោះពេជ្រ​មើល​ពី​លើ​ខុនដូ​កាសា​។ មឿន ញាណ

ជាច្រើន​ឆ្នាំ​ចុងក្រោយ​នេះ​មាន​ការ​ជជែក​ពិភាក្សា ការ​ផ្សព្វផ្សាយ​ក៏​ដូចជា​ការ​ទិញ​លក់​ខុនដូ​យ៉ាង​ច្រើន​នៅក្នុង​រាជធានី-ភ្នំពេញ ខណៈ​មាន​ប្រជាជន​កម្ពុជា​តិចតួច​ប៉ុណ្ណោះ​បាន​ភ្លក្ស​រសជាតិ​ជីវិត​ពិត​នៅ​ក្នុង​ខុនដូ​ទំនើប​តាមរយៈ​ការ​រស់នៅ ឬ​ទៅ​សិក្សា​នៅ​បរទេស ប៉ុន្តែ​ចាប់​ពី​ឆមាស​ទី​ ១ ឆ្នាំ​ ២០១៧ ​នេះ​មក​ម្ល៉េះ​គឺ​ចាប់ផ្តើម​មាន​តួលេខ​កើនឡើង​នៃ​ជនជាតិ​ខ្មែរ​មួយ​ចំនួន​បាន​ក្លាយ​ជា​ម្ចាស់​ខុនដូ ហើយ​បាន​សាកល្បង​រសជាតិ​ជីវិត​ខុនដូ​ដោយ​ផ្ទាល់​របស់​ពួកគេ​ពិតៗ​នៅ​កណ្តាល​រាជធានី​ចំណាស់​កន្លះ​សហសវត្សរ៍​នេះ​តែ​ម្តង​។

អ្នកស្រី ត. គឹម​លាន អាយុ​ ៧០ ​ឆ្នាំ និង​ស្វាមី​លោក ផូ ឪ អាយុ​ ៧៧ ​ឆ្នាំ​។ គូ​ស្វាមី​ភរិយា​វ័យ​ចំណាស់​មួយ​គូ​នេះ​កំពុង​រស់នៅ​យ៉ាង​សុខសាន្ត​តាម​ជីវភាព​ស៊ីវិល័យ​គឺ​ «​ជីវិត​ខុនដូ​» ​នៃ​អគារ​ថ្មី​សន្លាង​មួយ​នៅ​កណ្តាល​តំបន់​កោះពេជ្រ​នៃ​ដែនដី​សណ្តរ​ទន្លេ​ចតុមុខ​។ អ្នកស្រី​បាន​ថ្លែង​ទាំង​សប្បាយ​រីករាយ​ថា​៖ «​អូ​! ជីវិត​រស់នៅ​ក្នុង​ខុនដូ​កាសា​ (CASA Condo) នេះ​គឺ​មាន​ផាសុកភាព​ណាស់​។ ពួក​យើង​ពុំ​ធ្លាប់​ជួប​ទីកន្លែង​រស់នៅ​ណា​ល្អ​ប្រសើរ​បែប​ហ្នឹង​ទេ​»​។

ស្ត្រី​វ័យ​ចំណាស់​រូប​នេះ​បាន​បន្ត​ថា​នៅ​ទី​នេះ​មាន​ «​បរិយាកាស​ល្អ​ស្រស់ស្រាយ អគារ​ថ្មី​ស្អាត ទីធ្លា​សាធារណៈ​នៅ​ក្នុង​អគារ​នេះ​ក៏​ធំ​ទូលាយ​គួរសម រួម​ទាំង​ចំណត​យានយន្ត​ធំ​ទូលាយ​ដែរ​។ Casa គេ​មាន​ផ្តល់​សេវាកម្ម​ល្អៗ ការ​ណែនាំ​របស់​ពួកគេ​គឺ​ថា​បើ​យើង​ខ្វះខាត​អ្វីៗ ឬ​ត្រូវការ​ជំនួយ​អ្វីៗ​ពួកគេ​ជួយ​យើង​សព្វ​គ្រប់​ទាំងអស់​»​។

ទី​នេះ​មាន​សន្តិសុខ​សុវត្ថិភាព​ល្អ​គឺ​ចាប់​តាំងពី​ «​ពេល​ពួក​ខ្ញុំ​ងើប​ហាត់ប្រាណ​តាំងពី​ម៉ោង​ ៥ ​ព្រឹក យើង​ឃើញ​មាន​អ្នក​ចាំ​ជួយ​យើង រីឯ​ភ្នាក់ងារ​សន្តិសុខ​បាន​ដើរ​យាមកាម​នៅ​ជុំវិញ​ទីធ្លា​នេះ​ផ្តល់​ភាព​កក់ក្តៅ​តែ​ម្តង​»​។

ដោយ​ធ្លាប់​ឆ្លងកាត់​ដំណើរ​ជីវិត​មាន​ស្វាមី​ជា​មន្ត្រីរាជការ​ក្នុង​សង្គមចាស់ ​(​គឺ​មុន​សម័យ​សង្គ្រាម​ឆ្នាំ​ ១៩៧០) នៅ​ទីក្រុង​ប៉ៃលិន និង​ចាប់ផ្តើម​ភៀស​ខ្លួន​ទៅ​ប្រទេស​ថៃ​នៅ​ក្នុង​ឆ្នាំ​ ១៩៧៥ លុះ​ដល់​ចុង​ឆ្នាំ​នោះ​ដដែល​ទើប​ក្រុម​គ្រួសារ​របស់​អ្នកស្រី​បាន​ទៅ​រស់នៅ​សហរដ្ឋអាមេរិក​។

បច្ចុប្បន្ន​កូនៗ​របស់​អ្នកស្រី​ទាំងអស់​មាន​ការងារ​ធ្វើ និង​មាន​ផ្ទះ​រស់នៅ​រៀង​ខ្លួន ខណៈ​អ្នកស្រី និង​ស្វាមី​ក៏​មាន​ភូមិគ្រឹះ​មួយ​ខ្នង​នៅ​សហរដ្ឋអាមេរិក​ដែរ​។

អ្នកស្រី​បន្ត​ថា៖ «​នៅ​ខុនដូ​កាសា​ដោយ​មាន​បរិយាកាស និង​គេ​ផ្តល់​សេវាកម្ម​ល្អ​ទាន់​ចិត្ត​បាន​ធ្វើឲ្យ​ពួក​ខ្ញុំ​ទាំង​ពីរ​នាក់​មាន​អារម្មណ៍​សុខដុមរមនា​ណាស់​។ អ្នក​ធ្វើការ​នៅ​ទី​នេះ​រួសរាយ​រាក់ទាក់​ពួកគេ​យក​ចិត្ត​ទុកដាក់​នឹង​យើង​ក៏​ដូចជា​ម្ចាស់​យូនីត​ផ្សេងៗ​ដែរ​»​។

មុន​ពេល​ទិញ Casa Condo អ្នកស្រី​ធ្លាប់​មាន​វិឡា​មួយ​ខ្នង​នៅ​ជិត​ពោធិចិនតុង​បន្ទាប់​មក​បាន​ទិញ​ខុនដូរ៉ូស (Rose Condo) ចំនួន​ពីរ​បីយូនីត​ដែរ​។ «​យូនីត​របស់​យើង​នៅ​ខុនដូរ៉ូស ឥឡូវ​នេះ​បាន​លក់​ចេញ​វិញ​អស់​ហើយ​ព្រោះ​ទី​នោះ​មាន​យូនីត​តូចៗ​ចង្អៀត សូម្បី​តែ​កន្លែង​ចត​រថយន្ត​ក៏​តូច​ចង្អៀត​ពិបាក​ដែរ​» នេះ​បើ​តាម​ប្រសាសន៍​របស់​អ្នកស្រី គឹមលាន​។

នៅឯ​ជាន់​ទី​ ២១ ឯណោះ​វិញ​យុវជន​មួយ​រូប​ដែល​ជា​ម្ចាស់​យូនីត​ទំហំ​ ១១០ ​ម៉ែត្រការ៉េ​បាន​ឲ្យ​ដឹង​ថា​លោក​ទើប​តែ​បាន​មក​រស់នៅ​លើ​ខុនដូ​នេះ​កាលពី​ខែ​សីហា​កន្លង​មក​ថ្មីៗ​នេះ​ឯង​។

លោក វត្ថា លីយ៉ូនែល (Vutha Lionel) បាន​បើក​ទ្វារ​ឲ្យ​ចូល​មើល និង​ថតរូប​នៅ​ក្នុង​យូនីត​របស់​ខ្លួន​ដោយ​មាន​របស់របរ​ប្រើប្រាស់​ប្រចាំ​ថ្ងៃ​ខ្លះ​នៅ​រាយប៉ាយ​នៅ​លើ​តុ និង​ចង្ក្រាន​បាយ​។ ចំណែក​នៅឯ​បន្ទប់​ទទួល​ភ្ញៀវ​វិញ​មាន​សាឡុង​វែង ទូតាំង រីឯ​នៅ​លើ​ជញ្ជាំង​ឃើញ​មាន​តាំង​ដោយ​ផ្ទាំង​គំនូរ​ពណ៌​រូប​មុខ​ព្រហ្ម​នៃ​ប្រាសាទ​បាយ័ន​មួយ​ផ្ទាំង តាមពិត​នៅ​ក្នុង​បរិវេណ​បន្ទប់​ទទួល​ភ្ញៀវ​ធំ​នេះ​អត់​មាន​បើកភ្លើង​ទេ ប៉ុន្តែ​មាន​ពន្លឺ​ចូល​មក​តាមរយៈ​ទ្វារ​បង្អួច​កញ្ចក់​ធំៗ​ដែល​បើក​ចំហ​វាំងនន​ទាំង​ស្រុង​នោះ​តែ​ម្តង​។

លោក លីយ៉ូនែល បាន​ឲ្យ​ដឹង​ថា៖ «​ខ្ញុំ​កើត និង​ធំ​ដឹង​ក្តី​នៅ​ក្រោម​ដំបូល​ផ្ទះ​តាម​ប្រពៃណី​ខ្មែរ​ដូច​គេ​ដូច​ឯង​។ ប៉ុន្តែ​នៅ​ពេល​ទៅ​សាលារៀន​ភាសា​បារាំង យើង​បាន​ដឹង​តិចតួច​អំពី​របៀបរបប​រស់នៅ​ខុនដូ​ខ្លះៗ​។ លុះ​ពេល​ធ្វើការ​ខ្ញុំ​សន្សំ​បាន​ប្រាក់​មួយ​ចំនួន​ធំ រួមទាំង​អ្នក​ម្តាយ​លោកឪពុក តែងតែ​ជំរុញ​លើក​ទឹកចិត្ត​ឲ្យ​រូបខ្ញុំ​ត្រូវ​ចេះ​រៀន​រស់នៅ​ដោយ​ខ្លួនឯង​ផង ទើប​យើង​ទាំងអស់​គ្នា​បាន​សម្រេច​ចិត្ត​ទិញ​ខុនដូ​នេះ​តែ​ម្តង​»​។

«​មាន​ការ​ខុស​ប្លែក​គ្នា​ជាច្រើន​ចំពោះ​រូប​ខ្ញុំ​ពី​មុន​យើង​រស់នៅ​ជួបជុំ​សមាជិក​គ្រួសារ​ជាច្រើន​នាក់​មាន​ភាព​អ៊ូអរ និង​ខ្ញុំ​មាន​តែ​បន្ទប់​មួយ​តូច​ល្មម​មួយ​ទេ ប៉ុន្តែ​ខ្ញុំ​ត្រូវ​ជួយ​ធ្វើការ​រៀបចំ​ផ្ទះ​ជាច្រើន​អន្លើ​។ ឥឡូវ​នៅ​ទី​នេះ​បន្ទប់​របស់​ខ្ញុំ​ធំ​ទូលាយ និង​ពុំ​មាន​អីវ៉ាន់​អ្វី​ច្រើន​ស្មុគស្មាញ​ទេ​»​។ នេះ​បើ​តាម​សម្តី​របស់​លោក លីយ៉ូនែល​។ «​បរិយាកាស និង​ទេសភាព​ស្អាត​ធំ​ល្វឹងល្វើយ​មើល​ពី​គ្រែ​គេង​របស់​ខ្ញុំ​ទៅ​លើ​ទីក្រុង​ភ្នំពេញ​រហូត​ដល់​ជួរ​ភ្នំ​នៅឯ​នាយ​ឆ្ងាយៗ វា​បាន​ធ្វើឲ្យ​ខ្ញុំ​រីករាយ​មែនទែន​។ វា​ក៏​បើក​ចំហ​ខួរក្បាល​របស់​យើង​ឲ្យ​មាន​វិសាលភាព​កាន់តែ​ទូលំទូលាយ​សម្រាប់​ការ​គិត​អំពី​អនាគត​របស់​យើង​បាន​កាន់តែ​វែង​ឆ្ងាយ​ជាង​មុន​ដែរ​»​។

ដោយ​ធ្វើការ​ជា​បុគ្គលិក​នៃ​សាខា​ក្រុមហ៊ុន Century21 Cambodia ជាច្រើន​ឆ្នាំ លោក លីយ៉ូនែល បាន​មើល​ឃើញ​ពី​សក្តានុពល​ផ្នែក​វិស័យ​អចលនទ្រព្យ​របស់​ប្រទេស​កម្ពុជា​ទៅ​ថ្ងៃ​អនាគត​គឺ​ស្រដៀង​គ្នា​ទៅ​នឹង​ការ​យល់​ឃើញ​របស់​អ្នកស្រី គឹមលាន ដែរ ដោយ​អ្នកស្រី​ថ្លែង​ថា៖ «​ទៅ​ថ្ងៃ​អនាគត យើង​ពុំ​អាច​យក​ប្រាក់​ចំនួន​ប៉ុណ្ណេះ​ទិញ​បាន​ខុនដូ​ល្អ​បែប​នេះ​បាន​ទៀត​ទេ ហើយ​បើ​យើង​ចង់​លក់​វិញ​ក៏​អត់​ខាត​ដែរ​គឺ​ក្រុមហ៊ុន​គេ​ហ៊ាន​ទិញ​តាម​តម្លៃ​ដើម​វិញ​»​។

លោក លីយ៉ូនែល បញ្ជាក់​ថា៖ «​នៅ​ទី​នេះ​ផ្តល់​ភាព​ងាយស្រួល​សម្រាប់​អ្នក​ធ្វើការ​ដូច​ខ្ញុំ​ច្រើន​ណាស់​គឺ​ទាំង​ទៅ​មក​ជិត​កន្លែង​ធ្វើការ​មាន​ផ្សារ​ទំនើបៗ​រួម​ទាំង​ផ្សារ​អេអនម៉ល ភោជនីយដ្ឋាន​ល្អៗ និង​ជា​ទី​ប្រជុំជន​សំខាន់ៗ​នានា​ជាដើម​។ ហើយ​វា​នឹង​មាន​អ្វីៗ​ល្អ​ជាង​នេះ​កើតឡើង​ច្រើន​ថែម​ទៀត​នៅ​ពេល​ខាង​មុខ​នេះ​»​។

ម្ចាស់​យូនីត Condo Casa នៅ​ជាន់​ទី​ ២៧ ​មួយ​រូប​ទៀត​គឺ​អ្នកនាង រ័ត្ន វ័យ​ជាង​ ៣០ ​ឆ្នាំ​ជា​បុគ្គលិក​ក្រុមហ៊ុន​ឯកជន​មួយ​ក៏​បាន​សម្រេច​ចិត្ត​ជ្រើសរើស​ជីវភាព​រស់នៅ​ថ្មី​តាម​ខុនដូ​ផង​ដែរ ថ្វីបើ​អ្នកនាង​មាន​គេហដ្ឋាន​មួយ​នៅ​មិន​ឆ្ងាយ​ពី​កណ្តាល​ទីក្រុង​ភ្នំពេញ​នេះ​ក៏ដោយ​។

«​ជម្រើស​ដំបូង​របស់​ខ្ញុំ​គឺ​អត់​ចង់​ទៅ​នៅ​ទីតាំង​ណា​ឆ្ងាយ​ពី​កណ្តាល​ក្រុង​ទេ​។ ទី​នេះ​ងាយស្រួល​ទៅ​មក​កន្លែង​ធ្វើការ​ជិត​ផ្សារ​ទំនើបៗ ហាង​ធំៗ និង​គេ​ (​ម្ចាស់​វិនិយោគ​ខុនដូ​) ​មាន​ផ្តល់​សេវាកម្ម​ជាច្រើន​បន្ថែម​ទៀត​មាន​ទាំង​ទីកន្លែង​ហាត់ប្រាណ អាង​ហែល​ទឹក កន្លែង​ក្មេង​លេង ចំណត​យានយន្ត​ធំ​ទូលាយ អនាម័យ​ល្អ និង​ជាពិសេស​គឺ​បញ្ហា​សន្តិសុខ​សុវត្ថិភាព​ផ្ទាល់​ខ្លួន និង​ផ្ទះ​តែ​ម្តង​»​។ នេះ​បើ​តាម​សម្តី​របស់​អ្នកនាង រ័ត្ន​។ «​ពេល​មកពី​ធ្វើការ​នឿយហត់​គ្រាន់តែ​មក​ដល់​យូនីត​ភ្លាម​រួច​បើក​បង្អួច​មើល​ទៅ​ទេសភាព​ទីក្រុង​ក៏​មាន​កម្លាំង​បាត់​ស្ត្រេស បាត់​ធុញទ្រាន់ គឺ​យើង​មាន​តែ​ភាព​ស្រស់ស្រាយ​មក​ជំនួស​វិញ នេះ​ហើយ​គឺជា​ជីវិត​រីករាយ​របស់​យើង​រស់នៅ​ក្នុង​ខុនដូ​ទំនើប​»​។

បុគ្គលិក​ជាន់​ខ្ពស់​ (​សុំ​មិន​បង្ហាញ​អត្តសញ្ញាណ​) ​នៃ​គម្រោង Casa Meridian បាន​ឲ្យ​ដឹង​ថា៖ «​បើ​តាម​តួលេខ​លក់​ខុនដូ​ជូន​អតិថិជន​នៅ​ក្នុង​គម្រោង​នេះ​ទាំង​មូល​ដែល​មាន​ចំនួន​ ៥០០ ​យូនីត​គឺ​មាន​ប្រមាណ​ ៥០ ​ភាគរយ​ជា​អតិថិជន​ខ្មែរ និង​សល់​ពី​នោះ​គឺ​ជនបរទេស​»​។

អ្នកស្រី តាក់ សុភី ប្រធាន​គ្រប់គ្រង​ផ្នែក​អចលនទ្រព្យ​នៃ​គម្រោង Olympia របស់​ក្រុមហ៊ុន OCIC ដែល​បាន​ចាប់ផ្តើម​ប្រគល់​យូនីត​ខុនដូ​របស់​ខ្លួន​ជូន​ទៅ​អតិថិជន​ចាប់​តាំងពី​ដើម​ឆមាស​ទី​ ២ នេះ​ដែរ​បាន​ឲ្យ​ដឹង​ថា៖ «​អតិថិជន​របស់​យើង​ភាគច្រើន​ជា​ខ្មែរ​គឺ​មាន​ប្រមាណ​ ៦០-៧០ ​ភាគរយ​នៃ​យូនីត​ទាំងអស់​នៅ​ក្នុង​គម្រោង​នេះ​»៕

Source From : Phnom Penh Post 

LATEST EXCLUSIVE LISTING

Land For Sale
Sangkat Pir,Mittakpheap
USD 2,300,000.00
Land For Sale
Preaek Pnov,Ponhea Leu
USD 290.00/SQM
Land For Sale
Krang Thnong,Porsenchey
USD 428,888.00
Land For Sale
Chorm Chao,Porsenchey
USD 128,888.00
Flat House For Sale
Boeng Keng Kang I,Chamkarmon
USD 698,800.00

CVEA MEMBERS