ចំនួន​ខុនដូ​កើន​ជិត​ដល់​ ៥ ​ម៉ឺន​យូនីត​នៅ​កម្ពុជា

Languages

banner realestate

CVEA-Website-homepage-ad

591

vtrust

premuim housing

 
ចំនួន​ខុនដូ​កើន​ជិត​ដល់​ ៥ ​ម៉ឺន​យូនីត​នៅ​កម្ពុជា។ ហេង ជីវ័ន

ចំនួន​ខុនដូ​ទំនង​ជា​មិន​ស្រកស្រុត​ការ​ដាក់​ចូល​ក្នុង​ទីផ្សារ​នោះ​ទេ ខណៈ​ការ​សិក្សា​ថ្មី​មួយ​បាន​រកឃើញ​ថា​ចំនួន​ខុនដូ​បាន​កើន​ជិត​ដល់​ ៥០ ០០០ ​យូនីត​នៅ​ក្នុង​ដំណាច់​ឆមាស​ទី​ ១ ​ឆ្នាំ​នេះ​។

យោង​តាម​ការ​សិក្សា​របស់​ក្រុមហ៊ុន​ប៊ុណ្ណា​រៀលធីគ្រុប​ដែល​ទើប​បង្ហាញ​របាយការណ៍​បឋម​កាលពី​ថ្ងៃ​អង្គារ​បាន​រកឃើញ​ថា​ចំនួន​ខុនដូ​បាន​កើន​ពី​ ១២១ និង​មាន​លំនៅឋាន​សរុប​ចំនួន ៤៣,៦០៤ ​យូនីត​កើនឡើង​ដល់​ ១២៥ ​គម្រោង និង​មាន​ផ្ទះ​ចំនួន​ ៤៧,៧០៤ ​យូនីត​ក្នុង​ឆមាស​ទី​ ១ ​ឆ្នាំ​នេះ​ធៀប​រយៈពេល​ដូច​គ្នា​កាលពី​ឆ្នាំ​មុន​។ មាន​ន័យ​ថា​ក្នុង​រយៈពេល​ ៦ ​ខែ​ដើម​ឆ្នាំ​នេះ ចំនួន​ខុនដូ​បាន​កើនឡើង​តែ​ ៤ ​គម្រោង​ប៉ុណ្ណោះ​ក្នុង​នោះ​ ៣ ​គម្រោង​ស្ថិត​នៅ​ខេត្ត​ព្រះសីហនុ និង​មួយ​គម្រោង​នៅ​ទីក្រុង​ភ្នំពេញ​។

ការ​សិក្សា​ដដែល​បាន​រកឃើញ​ផងដែរ​ថា​ការ​លក់​ខុនដូ​បាន​កើនឡើង​ដែល​កាលពី​ឆមាស​ទី​ ១ ​ឆ្នាំ​មុន​ចំនួន​ខុនដូ​បាន​លក់​ចេញ​មាន​ចំនួន​ ៦០ ​ភាគរយ និង​ឆ្នាំ​នេះ​បាន​កើនឡើង​ ១ ​ភាគរយ​គឺ​កើន​ដល់​ ៦១​ ​ភាគរយ​នៃ​ចំនួន​ខុនដូ​សរុប​ដែល​បាន​ផ្គត់ផ្គង់​ចូល​ក្នុង​ទីផ្សារ​។ ទន្ទឹម​នឹង​នោះ​តម្លៃ​ខុនដូ​ក៏​បាន​កើនឡើង​ផង​ដែរ​ដោយ​ឆមាស​ទី​ ១ កាលពី​ឆ្នាំ​មុន​តម្លៃ​ខុនដូ​គិត​ជា​មធ្យម​ក្នុង​មួយ​ម៉ែត្រការ៉េ​មាន​តម្លៃ​ចន្លោះ​ពី ១៩៣៩ ​ទៅ​ ២២៩១ ​ដុល្លារ​បាន​ឡើង​ដល់​ ២០៨៥ ​ទៅ​ ២៥៥០ ​ដុល្លារ​ក្នុង​មួយ​ម៉ែត្រការ៉េ​។

ការ​សិក្សា​នេះ​បាន​រកឃើញ​ថា​គម្រោង​ដែល​បញ្ចប់​ការ​សាងសង់​នៅ​ឆ្នាំ​នេះ​មាន​ប្រមាណ​ ១៧ ​ភាគរយ​កើនឡើង​ ១ ​ភាគរយ​ធៀប​រយៈពេល​ដូច​គ្នា​កាលពី​ឆ្នាំ​មុន​ហើយ​ខុនដូ​ដែល​បញ្ចប់​ការ​សាងសង់​ភាគច្រើន​នៅ​ឆ្នាំ​ ២០១៩ និង​ឆ្នាំ​ ២០២០ ​ខាង​មុខ​នេះ​។

លោក ប៉ែន សុខគា នាយក​ផ្នែក​វាយតម្លៃ​នៃ​ក្រុមហ៊ុន​ប៊ុណ្ណារៀលធីគ្រុប​បាន​ថ្លែង​ថា៖ «​ប្រសិន​ជា​ស្ថានភាព​នយោបាយ​មាន​កម្ដៅ​ស្ថានភាព​នៃ​ការ​លក់​ខុនដូ​អាច​ជួប​ការ​លំបាក ប៉ុន្តែ​ប្រសិន​ជា​ការ​បោះឆ្នោត​ជាតិ​នា​ពេល​ខាង​មុខ​មិន​មាន​បញ្ហា​ចំនួន​ខុនដូ​ដែល​បាន​ដាក់​ចូល​ក្នុង​ទីផ្សារ​នឹង​មិន​មាន​បញ្ហា​អ្វី​ឡើយ​»​។

លោក​បន្ត​ថា៖ «​ទោះ​ជា​ប្រជាជន​ខ្មែរ​មិន​ទាន់​រស់នៅ​ខុនដូ​ច្រើន ប៉ុន្តែ​រយៈពេល​ ១០ ​ឆ្នាំ​ក្រោយ​ពួកគេ​នឹង​ផ្លាស់ប្តូរ​ផ្នត់​គំនិត​របស់​ពួកគេ​មក​រស់​នៅ​តាម​ខុនដូ​»​។

លោក​បន្ត​ថា​ការ​កើនឡើង​នូវ​ការ​ផ្គត់ផ្គង់​អាផាតមិន និង​ការ​រក្សា​តម្លៃ​ជួល​ក្នុង​ទម្រង់​ដដែល​បាន​ដាក់​សម្ពាធ​វិស័យ​ខុនដូ​ផង​ដែរ​នាពេល​បច្ចុប្បន្ន​នេះ​។

យោង​តាម​ការសិក្សា​របស់​ក្រុមហ៊ុន Urban Living Solution ដែល​បាន​បញ្ចប់​នាពេល​ថ្មីៗ​នេះ​បាន​រកឃើញ​ថា​កំណើន​ប្រជាសាស្ត្រ​នៅ​ក្នុង​ទីក្រុង​នឹង​កើន​ឡើង​ដល់​ ៤ ​លាន​នាក់​នៅ​ឆ្នាំ​ ២០៣០ ការ​កកស្ទះ​ចរាចរណ៍ ការ​កើនឡើង​នូវ​បច្ចេកវិទ្យា​សម្រាប់​ជីវិត​មនុស្ស​សម័យថ្មី និង​ចរន្ត​នៃ​យុវជន​វ័យ​ក្មេង​កាន់តែ​ច្រើន ពួកគេ​នឹង​សម្រេច​ចិត្ត​រស់នៅ​តាម​ខុនដូ​កាន់តែ​ច្រើន​នា​ពេល​នោះ​។

លោក​ឧកញ៉ា សៀ រិទ្ធី ប្រធាន​ក្រុមប្រឹក្សា​ភិបាល​នៃ​ក្រុមហ៊ុន World Bridge Group បាន​ថ្លែង​ថា​នៅ​ពេល​បច្ចុប្បន្ន​ប្រជាពលរដ្ឋ​រស់នៅ​ក្រុង​ភ្នំពេញ​បូក​ទាំង​អ្នក​រស់នៅ​តាម​បណ្តា​ខេត្ត​ដែល​ចេញ​ចូល​រាជធានី​រាល់​ថ្ងៃ​មាន​ប្រមាណ ៣ ​លាន​នាក់​ហេតុ​នេះ​នៅ​ឆ្នាំ​ ២០៣០ លោក​គិត​ថា​ចំនួន​ប្រជាពលរដ្ឋ​នឹង​កើន​ដល់ ៥ ​​លាន​នាក់​នៅ​ក្រុង​ភ្នំពេញ​។

លោក​បន្ត​ថា ​ការ​វិនិយោគ​ខុនដូ​របស់​លោក​ដោយសារ​លោក​សម្លឹង​ឃើញ​ចរន្ត​នៃ​ការ​អភិវឌ្ឍ​សេដ្ឋកិច្ច សង្គម ព្រោះ​នៅ​ពេល​ប្រទេស​រីកចម្រើន​ដី​ឡើង​ថ្លៃ ប្រជាពលរដ្ឋ​នឹង​សម្រេច​ចិត្ត​រស់នៅ​តាម​ខុនដូ​ដោយសារ​ការ​កកស្ទះ​ចរាចរណ៍​ការ​កើនឡើង​នូវ​តម្លៃ​ដីធ្លី និង​លំនៅឋាន​។

លោក​បន្ត​ថា៖ «​ខ្ញុំ​មិន​ព្រួយបារម្ភ​ពី​ការ​ផ្គត់ផ្គង់​ទេ​ព្រោះ​ពេល​និយាយ​ពី​ខុនដូ​ត្រូវ​និយាយ​ពី​ទីតាំង និង Lifestyle ព្រោះ​ខុនដូ​របស់​ខ្ញុំ​គឺ​លក់ Lifestyle មិនមែន​លក់​តែ​បន្ទប់​គេង​ទេ​»​។

លោក​បន្ត​ថា៖ «​ដោយ​នាំ​មក​នូវ​អ្នក​វិនិយោគ​ដែល​មាន​ជំនាញ និង​បទពិសោធ​ខ្ពស់ ខុនដូ The Bridge ជា​ខុនដូ​គំរូ​មួយ​ដែល​លក់​បាន​ជោគជ័យ​ក្នុង​រយៈពេល​តែ​ ៣-៤ ​ខែ​ប៉ុណ្ណោះ​»​។

បើ​តាម​យោបល់​របស់​លោក សុខគា បាន​បញ្ជាក់​ថា​អ្នក​ទិញ​ខុនដូ​ភាគច្រើន​នាពេល​បច្ចុប្បន្ន​នេះ​គឺ​ជនជាតិ​ចិន​បាន​ជាប់​ចំណាត់​ថ្នាក់​លេខ​ ១ បន្ទាប់មក​កូរ៉េ និង​ជនជាតិ​កម្ពុជា​។

លោក​ឧកញ៉ា ចេង ខេង ប្រធាន​ក្រុមប្រឹក្សា​ភិបាល​នៃ​ក្រុមហ៊ុន Hutton CPL បាន​ថ្លែង​ថា​ទីផ្សារ​ខុនដូ​កាន់​តែ​មាន​ភាព​ល្អប្រសើរ​ទោះបី​ជា​មាន​មនុស្ស​មួយ​ចំនួន​ព្រួយបារម្ភ​ក្តី ប៉ុន្តែ​មាន​អ្នក​វិនិយោគ​ធំៗ​ជាច្រើន​កំពុង​សិក្សា​ដើម្បី​ចាប់ផ្តើម​គម្រោង​របស់​ពួកគេ​នៅ​ឡើយ​ដោយសារ​ពួកគេ​មើល​ឃើញ​សក្តានុពល​នៅ​ក្នុង​ទីផ្សារ​នេះ​នៅ​តែ​មាន​ព្រោះ​បច្ចុប្បន្ន​មាន​ជនបរទេស​កាន់តែ​ច្រើន​បាន​ចូល​មក​កម្ពុជា​ហើយ​អ្នក​ទិញ​ខុនដូ​ភាគច្រើន​ជា​ជនជាតិ​ចិន និង​សិង្ហបុរី​៕

Source From : Phnom Penh Post

 

LATEST EXCLUSIVE LISTING

Land For Sale
Sangkat Pir,Mittakpheap
USD 2,300,000.00
Land For Sale
Preaek Pnov,Ponhea Leu
USD 290.00/SQM
Land For Sale
Krang Thnong,Porsenchey
USD 428,888.00
Land For Sale
Chorm Chao,Porsenchey
USD 128,888.00
Flat House For Sale
Boeng Keng Kang I,Chamkarmon
USD 698,800.00

CVEA MEMBERS