ទំព័រដើម

Languages

hostgator coupon code 50 off
  • 1a
  • 1b
  • 2a
  • 3a
  • 4a
  • ava 1
  • ava 2
  • ava 4
  • THE SEAGATE SUITE

  • THE SEAGATE SUITE

 Axis Residences

KHMER CAPITAL MICROFINANCE INSTITUTION PLC

vtrust

SurinPhumi – Eco-Green Community

Thu, 24 September 2015 Ananth Baliga and ចេង សុខហ័ង

12

ភ្នំពេញៈ ក្រុម​ហ៊ុន Smart ID Group របស់​ប្រទេស​ថៃ​គ្រោង​នឹង​ពង្រីក​ការ​លក់​គ្រឿង​អេឡិច​ត្រូនិក​របស់​ខ្លួន​ក្នុង​ប្រទេស​កម្ពុជា​តាម​រយៈ​ភាព​ដៃ​គូ​ជា​មួយ​ក្រុម​ហ៊ុន​ចែក​ចាយ​ក្នុង​ស្រុក។

លោក Thomas Hongpakdee អគ្គ​នាយក និង​ជា​នាយក​គ្រប់​គ្រង​ក្រុម​ហ៊ុន Smart ID Group ​បាន​ប្រាប់​ភ្នំពេញ​ប៉ុស្តិ៍​តាម​អ៊ីមែល​កាល​ពី​ថ្ងៃ​ម្សិលមិញ​ថា​ ក្រុមហ៊ុន​លោក​គ្រោង​នឹង​វិនិយោគ​ទឹក​ប្រាក់​ចំនួន​៥​សែន​ដុល្លារ​ក្នុង​មួយ​ឆ្នាំ​នៅ​ទីផ្សារ​កម្ពុជា​ ដើម្បី​ផ្សព្វផ្សាយ​ម៉ាក​ផលិតផល​នានា ​រួម​ទាំង​ម៉ាក់ ​Anitech ដ៏​សំខាន់​របស់​ខ្លួន​ផង​ដែរ។​

លោក​ថ្លែង​ថា​៖ «​ទោះ​បី​ជា​ប្រទេស​កម្ពុជា​មិន​មែន​ជា​ទីផ្សារ​ធំ​ក៏​ដោយ ក៏​ផែន​ការ​របស់​យើង​នឹង​ធ្វើ​ឲ្យ​ប្រទេស​នេះ​ក្លាយ​ជា​ទិសដៅ​ដ៏​ជោគ​ជ័យ​មួយ»​។

លោក​បន្ថែម​ថា​៖ «​បន្ទាប់​ពី​ទទួល​បាន​ដៃ​គូ [ចែក​ចាយ] ល្អ​ ផែន​ការ​របស់​យើង​សម្រាប់​ការ​វិនិយោគ​នេះ​ ភាគ​ច្រើន​នឹង​ផ្ដោត​លើ​ការ​ផ្សព្វ​ផ្សាយ​ម៉ាក​ផលិត​ផល»។

លោក​បន្ត​ថា​ ទឹក​ប្រាក់​វិនិយោគ​នេះ​នឹង​ត្រូវ​ប្រើ​ប្រាស់​ដើម្បី​បង្កើត​ហាង​លក់​ផលិត​ផល​មួយ​ និង​ការិយាល័យ​តំណាង​នៅ​ក្រុង​ភ្នំពេញ​ និង​ចំណាយ​លើ​បុគ្គលិក ឬ​ព្រឹត្តិការណ៍ ព្រម​ទាំង​ការ​ចំណាយ​លើ​ការ​ធ្វើ​ទីផ្សារ​។ ​ការ​វិនិយោគ​នេះ​អាច​កើន​ឡើង​ ប្រសិន​បើ​ទីផ្សារ​នេះ​បង្ហាញ​ការ​ឆ្លើយ​តប​។

លោក ​ឈឹម​ សាង​ហេង​ ម្ចាស់​ហាង​ទូរស័ព្ទ​ និង​គ្រឿង​អេឡិច​ត្រូនិក​យីហោ ​ហាក់ ​សែ​ បាន​ថ្លែង​ថា ​កន្លង​មក​បើ​ទោះ​ជា​មាន​ផលិត​ផល​គ្រឿង​អេឡិច​ត្រូនិក​ម៉ាក​ថ្មី​ចូល​មក​ក្នុង​ទីផ្សារ​ក្តី ក៏​លោក​សង្កេត​ឃើញ​ថា​ អតិថិជន​មិន​ងាយ​នឹង​ងាក​ទៅ​រក​ផលិត​ផល​ថ្មី​ទាំង​នោះ​ទេ​។ លោក​ថា៖ «អតិថិជន​មិន​ទុក​ចិត្ត​ផលិត​ផល​ [ម៉ាក] ថ្មី៕ LA

Source From:Phnom Penh Post

Thu, 24 September 2015 Ananth Baliga and ចេង សុខហ័ង

ភ្នំពេញៈ ក្រុមហ៊ុន​ទូរគមនាគមន៍​នៅ​កម្ពុជា​បាន​ស្វាគមន៍​សារាចរ​របស់ រដ្ឋាភិបាល​កាល​ពី​ថ្ងៃ​អង្គារ ដែល​តម្រូវ​អតិថិជន​ផ្តល់​អត្តសញ្ញាណ​ក្នុង​ការ​ជាវ​ស៊ីម​កាត។

ក្នុង​សន្និសីទ​សារ​ព័ត៌មាន ដែល​ធ្វើ​ឡើង​រួម​គ្នា​ដោយ​នគរបាល​ជាតិ និង​ក្រសួង​ប្រៃសណីយ៍ និង​ទូរគមនាគមន៍ រដ្ឋាភិបាល​បាន​ឲ្យ​ដឹង​ថា ក្រុមហ៊ុន​លក់​រាយ​ត្រូវ​តែ​បំពេញ​តម្រូវ​ការ​ឯកសារ​អត្ត​សញ្ញាណ មុន​ពេល​ចេញ​ស៊ីម​កាត បើ​មិន​អ៊ីចឹង​ទេ​នឹង​ប្រឈម​ការ​ចាប់​ខ្លួន។

សារាចរ​នេះ​បាន​ឲ្យ​ដឹង​ថា ប្រតិបត្តិករ​ទូរគមនាគមន៍ ត្រូវ​តែ​សហការ​ជាមួយ​អតិថិជន​ឲ្យ​ចុះ​បញ្ជី​ឯកសារ​នៅ​ក្នុង​រយៈពេល​ ៣​​ ខែ បើ​មិន​អ៊ីចឹង​ទេ​ស៊ីម​កាត​របស់​ពួក​គេ​នឹង​ត្រូវ​បញ្ចប់។

លោក Thomas Hundt អគ្គនាយក​ប្រតិបត្តិករ​ទូរគមនាគមន៍ Smart Axiata បាន​ថ្លែង​ថា៖ «សារាចរ​នេះ​គឺ​មិន​មែន​ថ្មី​នោះ​ទេ។ វា​គឺជា​តម្រូវ​ការ​ក្នុង​ការ​ចុះ​បញ្ជី​អត្ត​សញ្ញាណ នៅ​ពេល​អតិថិជន​ទិញ​ស៊ីម​កាត»។

លោក​បន្ត​ថា ឈ្មួញ និង​ក្រុមហ៊ុន​ចែកចាយ​របស់​ស្មាត​ត្រូវ​បាន​តម្រូវ​ប្រមូល​ព័ត៌មាន​អត្ត​សញ្ញាណ​ពី​អតិថិជន ប៉ុន្តែ​លោក​ទទួល​ស្គាល់​ថា អ្នក​ចែកចាយ​របស់​ខ្លួន​ខ្លះ​មិន​ត្រូវ​បាន​អង្កេត​ឲ្យ​បាន​តឹងរ៉ឹង​ពី​គោល​នយោបាយ​នេះ​ទេ។

លោក​បន្ត​ថា៖ «យើង​នឹង​ធ្វើ​ការងារ​រួម​គ្នា​នៅ​ក្នុង​ឧស្សាហ​កម្ម​នេះ ហើយ​ជាមួយ​នឹង​ស្ថាប័ន​បទ​ប្បញ្ញត្តិ​ដើម្បី​ធានា​ថា​សារាចរ​នេះ​ត្រូវ​បាន​អនុវត្ត​តាម»។

តំណាង​មួយ​រូប​មក​ពី​ក្រុមហ៊ុន​ទូរគមនាគមន៍​ធំ​ផ្សេង​ទៀត​នៅ​ក្នុង​ប្រទេស​កម្ពុជា​បាន​ថ្លែង​ថា ក្រុមហ៊ុន​ចេញ​ស៊ីម​កាត​រាប់​ពាន់​ឲ្យ​អ្នក​ចែក​ចាយ​បន្ត ដែល​បន្ទាប់​មក​ចែក​ចាយ​ស៊ីម​កាត​ទាំង​នោះ​ដល់​ឈ្មួញ​តូចៗ​ជា​ច្រើន​ទៀត។

លោក​បញ្ជាក់​ថា៖ «ជា​ធម្មតា​ក្រុមហ៊ុន​តម្រូវ​ឲ្យ​ឈ្មួញ​ត្រូវ​បញ្ជូន​ត្រឡប់​នូវ​បែប​បទ និង​ព័ត៌មាន​អត្ត​សញ្ញាណប័ណ្ណ ប៉ុន្តែ​ជួន​កាល​ឈ្មួញ​បាត់បង់​ព័ត៌មាន​នេះ»។ លោក​បន្ត​ថា៖ «វា​មាន​ការ​ពិបាក​សម្រាប់​ឈ្មួញ​ក្នុង​ការ​គ្រប់គ្រង​រាល់​ព័ត៌មាន​ទាំង​អស់​ដោយ​សារ​ពួក​គេ​បាន​ចែកចាយ​ស៊ីម​កាត​រាប់​ពាន់»។

ការ​ពង្រឹង​នូវ​ការ​អនុវត្ត​តម្រូវ​ការ​ឯកសារ​បញ្ជាក់​អត្តសញ្ញាណ​គឺជា​វិធានការ​មួយ​ដ៏​ល្អ​ក្នុង​ការ​ធ្វើ​ឲ្យ​វិស័យ​ទូរគមនាគមន៍​របស់​ប្រទេស​កម្ពុជា​ស្ថិត​ក្នុង​ស្ដង់ដារ​អន្តរជាតិ។ នេះ​បើ​យោង​តាម​លោក Alan Sinfield អគ្គនាយក​ក្រុមហ៊ុន qb។

លោក​បន្ត​ថា៖ «លើស​ពី​នេះ​ទៅ​ទៀត វា​គួរ​តែ​លើក​កម្ពស់​ការ​លក់​ដែល​មាន​ការ​ទទួល​ខុស​ត្រូវ និង​ការ​ចែកចាយ​ស៊ីម​កាត ដោយ​ប្រតិបតិ្តករ​ទូរស័ព្ទ​ចល័ត និង​ដៃ​គូ​ជា​អ្នក​លក់​របស់​ពួក​គេ ដែល qb តែង​តែ​បាន​ខិត​ខំ​ធ្វើ»។

អ្នក​ស្រី សូយ មួយ ជា​អ្នក​លក់​ស៊ីម​កាត​ម្នាក់​នៅ​ទីក្រុង​ភ្នំពេញ បាន​ឲ្យ​ដឹង​ថា​អ្នក​ស្រី​បាន​និង​កំពុង​លក់​ស៊ីម​កាត​ឲ្យ​អតិថិជន​ដោយ​មិន​តម្រូវ​ឲ្យ​ពួក​គេ​ផ្ដល់​ឯកសារ​អត្តសញ្ញាណ​ណា​មួយ​របស់​ពួក​គេ​នោះ​ទេ​។

អ្នក​ស្រី​បន្ត​ថា៖ «ទោះបីជា​ពួក​គេ​មិន​មាន​អត្ត​សញ្ញាណប័ណ្ណ​ក៏​ដោយ ក៏​ពួក​គេ​នៅ​តែ​អាច​ទិញ​ស៊ីម​កាត​ពី​ហាង​ខ្ញុំ​បាន​ដែរ វា​ជា​ជម្រើស​របស់​អតិថិជន»។

អ្នក​ស្រី​បន្ត​ថា៖ «ក្មេងៗ​ជំទង់​ភាគ​ច្រើន​ចង់​ប្រើ​ប្រាស់​ស៊ីម​កាត​ច្រើន​ក្នុង​រយៈពេល​ខ្លី ហើយ​បន្ទាប់​មក​ពួក​គេ​ចង់​ផ្លាស់​ប្តូរ​ទៅ​ប្រើ​ស៊ីម​កាត​ថ្មី​មួយ​ទៀត»៕ LA

Source From:Phnom Penh Post

Thu, 24 September 2015 Ananth Baliga

ភ្នំពេញៈ សមាគម​សហគ្រាស​វាយនភ័ណ្ឌ​របស់​សភា​ពាណិជ្ជកម្ម​របស់​ប្រទេស​ចិន (TEAC) ប្រចាំ​កម្ពុជា​បាន​ចាប់​ផ្ដើម​ដំណើរ​ការ​ជា​ផ្លូវ​ការ​នៅ​ទីក្រុង​ភ្នំពេញ​នៅ​សប្តាហ៍​នេះ។

មន្ដ្រី​បាន​ថ្លែង​នៅ​ក្នុង​ព្រឹត្តិការណ៍​កាល​ពី​ថ្ងៃ​អង្គារ​ថា TEAC មាន​បំណង​ក្នុង​ការ​ជំរុញ​ឲ្យ​មាន​ការ​វិនិយោគ​របស់​ប្រទេស​ចិន​នៅ​ក្នុង​ឧស្សាហកម្ម​កាត់​ដេរ​របស់​ប្រទេស​កម្ពុជា ដែល​កំពុង​ផ្ដល់​សេវា​ជា​ច្រើន​ដូច​ជា​ការ​ប្រឹក្សា​ផ្នែក​ច្បាប់ និង​ការ​គាំទ្រ​ទំនាក់​ទំនង​សម្រាប់​វិនិយោគិន​វិស័យ​កាត់​ដេរ និង​ស្បែក​ជើង​ដែល​មាន​ស្រាប់​ប្រកប​ដោយ​សក្ដានុពល​មក​ពី​ប្រទេស​ចិន។

លោក Enjoy Ho ប្រធាន TEAC បាន​ថ្លែង​ថា៖ «យើង​នឹង​ធ្វើ​ជា​តំណាង​ផល​ប្រយោជន៍​របស់​សហគ្រាស​វាយនភ័ណ្ឌ​របស់​ប្រទេស​ចិន​ប្រចាំ​កម្ពុជា និង​ឆ្លុះ​បញ្ចាំង​ពី​តម្រូវ​ការ​សម​ហេតុ​ផល​របស់​ពួក​គេ​ចំពោះ​រដ្ឋាភិបាល»។

យោង​តាម​លោក Ho វិនិយោគិន​ជាច្រើន​មក​ពី​ប្រទេស​ចិន ទីក្រុង​ហុងកុង និង​តៃវ៉ាន់ មាន​ចំនួន​ប្រហែល ៧០ ​ភាគរយ​នៃ​រោងចក្រ​កាត់ដេរ និង​ស្បែក​ជើង​នៅ​ក្នុង​ប្រទេស​កម្ពុជា។

លោក​លើក​ឡើង​ថា សមាគម​ថ្មី​នេះ​ជា​ការ​ជំរុញ​ដល់​កំណើន​នៅ​ក្នុង​ឧស្សាហ​កម្ម​នេះ ទោះ​បី​ជា​ការ​បង្កើន​ប្រាក់​ឈ្នួល ការ​ចុះ​ខ្សោយ​តម្លៃ​រូបិយប័ណ្ណ​អាស៊ី និង​ការ​កើន​ឡើង​សមត្ថភាព​ប្រកួត​ប្រជែង​ពី​ប្រទេស​ជិត​ខាង​ដូច​ជា​វៀតណាម ដែល​នៅ​ពេល​ថ្មីៗ​បាន​បញ្ចប់​ការ​ចរចា​ស្ដីពី​កិច្ច​ព្រម​ព្រៀង​ពាណិជ្ជកម្ម​ជាមួយ​សហភាព​អឺរ៉ុប​ក៏​ដោយ។

លោក​បន្ត​ថា៖ «សហគ្រាស​វាយនភ័ណ្ឌ​របស់​ប្រទេស​ចិន​នឹង​ត្រូវ​តែ​ប្រើ​ប្រាស់​អត្ថ​ប្រយោជន៍​ដែល​ប្រកួត​ប្រជែង​របស់​ប្រទេស​កម្ពុជា ដើម្បី​ទាក់ទាញ​ការ​វិនិយោគ​កាន់​តែ​ច្រើន និង​បង្កើន​ការ​ផលិត​នៅ​ទីនេះ»។

លោក ជា វុទ្ធី អគ្គ​លេខាធិការ​រង​ក្រុម​ប្រឹក្សា​វិនិយោគ​កម្ពុជា នៅ​ក្នុង​ក្រុម​ប្រឹក្សា​អភិវឌ្ឍន៍​កម្ពុជា​បាន​ស្វាគមន៍​ដល់​ការ​បង្កើត​របស់ TEAC ចំ​ពេល​នៃ​ការ​កើន​ឡើង​សម្ពាធ​ប្រកួត​ប្រជែង​សម្រាប់​ការ​វិនិយោគ​បរទេស។

លោក​បាន​ថ្លែង​ថា៖ «យើង​មាន​សំណាង​ដែល​ប្រទេស​កម្ពុជា និង​ចិន មាន​ទំនាក់​ទំនង​ល្អ​ដែល​បាន​បង្កើត​ឡើង​ដោយ​របប​ចាស់ និង​របប​ថ្មី»។ លោក​វុទ្ធី បាន​ជំរុញ​ឲ្យ TEAC ត្រូវ​ជំរុញ​ឲ្យ​មាន​ការ​វិនិយោគ​នៅ​ក្នុង​ការ​ផលិត​វត្ថុ​ធាតុ​ដើម​នៅ​ក្នុង​ប្រទេស​កម្ពុជា ជា​អ្វីៗ ដែល​លោក​បាន​ថ្លែង​ថា​នឹង​ជួយ​ពង្រឹង​សមត្ថភាព​ប្រកួត​ប្រជែង​របស់​ប្រទេស​កម្ពុជា៕ LA

Source From:Phnom Penh Post

Wed, 23 September 2015 ស៊ន សារ៉ាត and ចេង សុខហ័ង

ភ្នំពេញៈ ធនាគារ​អភិវឌ្ឍន៍​អាស៊ី (ADB) បាន​ទម្លាក់​ការ​ព្យាករ​កំណើន​សេដ្ឋកិច្ច​របស់​ប្រទេស​កម្ពុជា​មក​នៅ​ត្រឹម ៧​ភាគរយ​នៅ​ឆ្នាំ​២០១៥ និង ៧,២​ភាគរយ​សម្រាប់​ឆ្នាំ​២០១៦។ នេះ​បើ​យោង​តាម​របាយការណ៍​ថ្មី​មួយ​របស់ ADB ដែល​ចេញ​ផ្សាយ​កាលពី​ថ្ងៃទី​២២ កញ្ញា។

ក្នុង​របាយ​ការណ៍​បច្ចុប្បន្ន​ភាព​របស់​ខ្លួន​ស្តីពី​ចក្ខុ​វិស័យ​អភិវឌ្ឍន៍​អាស៊ី (ADO) ឆ្នាំ​២០១៥ ADB បាន​ព្យាករ​កំណើន​ផលិតផល​ក្នុង​ស្រុក​សរុប (GDP) របស់​កម្ពុជា ៧ភាគរយ​សម្រាប់​ឆ្នាំ​២០១៥ និង ៧,២ ភាគរយ​សម្រាប់​ឆ្នាំ​២០១៦ ដោយ​ធ្លាក់​ចុះ​ពី​ការ​ព្យាករ​កាល​ពី​ខែ​មីនា​ពី ៧,៣​ភាគរយ និង ៧,៥​ភាគរយ។

លោក Jan Hansen សេដ្ឋវិទូ​ជាន់​ខ្ពស់​ប្រចាំ​ប្រទេស​របស់ ADB ថ្លែង​ថា ការ​កើន​ឡើង​ផលិតកម្ម រោងចក្រ​កាត់​ដេរ​សម្លៀក​បំពាក់ សំណង់ និង​សេវាកម្ម​ពិសេស​ទេសចរណ៍ សេវា​ហិរញ្ញវត្ថុ និង​សេវា​អចលនទ្រព្យ បន្ត​ជំរុញ​ដល់​កំណើន​សេដ្ឋកិច្ច។

លោក​បន្ត​ថា៖ «ប៉ុន្តែ​កំណើន​នៅ​ក្នុង​ការ​នាំ​ចេញ និង​ទេសចរណ៍ បាន​ធ្លាក់​ចុះ​បន្តិច​នៅ​ឆមាស​ទី ១ ឆ្នាំ ​២០១៥ ខណៈ​វិស័យ​កសិកម្ម​ទទួល​រង​ផល​ប៉ះពាល់​ដោយ​ភ្លៀង​ធ្លាក់​កម្រិត​ទាប​រយៈពេល​យូរ»។

លោក​លើក​ឡើង​ក្នុង​របាយការណ៍​ថា តម្រូវ​ការ​ក្នុង​ស្រុក​ហាក់​កំពុង​មាន​ភាព​ប្រសើរ​ខ្លាំង ជាមួយ​នឹង​កំណើន​ឥណទាន​ក្នុង​វិស័យ​ឯកជន​កាល​ពី​ខែ​ឧសភា​ជាង ៣០​ភាគរយ ធៀប​នឹង​រយៈពេល​ដូច​គ្នា​កាល​ពី​ឆ្នាំ​មុន ព្រម​ទាំង​កំណើន​នាំ​ចូល​ខ្ពស់​ផង​ដែរ។

ការ​ទម្លាក់​ការ​ព្យាករ​កំណើន​ពេល​នេះ​ដោយ​សារ​តែ​កំណើន​ទាប​នៅ​ក្នុង​វិស័យ​សំខាន់ៗ​មួយ​ចំនួន​របស់​កម្ពុជា។

ការ​នាំ​ចេញ​សម្លៀក​បំពាក់ និង​ស្បែក​ជើង​របស់​កម្ពុជា​នៅ​ឆមាស​ទី១​ឆ្នាំ​២០១៥ បាន​កើន​ឡើង ១១,០​ភាគរយ ដោយ​ធ្លាក់​ចុះ​ពី ១៤,៥​ ភាគរយ​នៅ​ឆមាស​ទី ១​ ឆ្នាំ​ ២០១៤។ នេះ​បើ​តាម​របាយការណ៍។

លោក​ចាន់ សុផល អ្នក​វិភាគ​សេដ្ឋកិច្ច និង​នាយក​មជ្ឈមណ្ឌល​សិក្សា​គោល​នយោបាយ​បាន​ឲ្យ​ដឹង​ថា កំណើន​យឺត​ក្នុង​ការ​នាំ​ចេញ​សម្លៀក​បំពាក់​ទាក់ទង​នឹង​ទំនុក​ចិត្ត​របស់​អ្នក​បញ្ជា​ទិញ។ លោក​បន្ត​ថា៖«វា​អាច​បណ្តាល​មក​ពី​ការ​បញ្ជា​ទិញ​របស់​អ្នក​បញ្ជា​ទិញ ព្រោះ​ពួក​គេ​ត្រូវ​ការ​ការ​ធានា​ឲ្យ​បាន​កាន់​តែ​ខ្លាំង [លើ​ការ​ផ្គត់​ផ្គង់] ពី​រោងចក្រ​ផលិត ដូច្នេះ​យើង​ត្រូវ​តែ​ប្រុងប្រយ័ត្ន​ជាង​មុន​ទាក់ទង​ទៅ នឹង​ការ​ដឹក​ជញ្ជូន»។

លោក​បន្ត​ថា ការ​កើន​ឡើង​នូវ​ការ​ធ្វើ​កូដកម្ម​បាន​បង្អាក់​ដល់​ផលិតកម្ម។

ឧស្សាហកម្ម​កាត់​ដេរ​ប្រឈម​នឹង​ការ​ប្រកួត​ប្រជែង​ពី​ការ​កើន​ឡើង​តម្លៃ​ប្រាក់​ដុល្លារ​អាមេរិក និង​ពី​ដៃ​គូ​ប្រកួត​ប្រជែង​ដែល​មាន​ប្រាក់​ឈ្នួល​ទាប រួម​ទាំង​ប្រទេស​មីយ៉ាន់ម៉ា។ នេះ​បើ​យោង​តាម​របាយការណ៍។

ប៉ុន្តែ​លោក ចាន់ សុផល មិន​បារម្ភ​ចំពោះ​ការ​ប្រកួត​ប្រជែង​ពី​សំណាក់​ប្រទេស​មីយ៉ាន់ម៉ា​នោះ​ទេ។ លោក​ថ្លែង​ថា៖«វិស័យ​កាត់​ដេរ​របស់​មីយ៉ាន់ម៉ា​នៅ​តូច​នៅ​ឡើយ មិន​ទាន់​ច្រើន​ទេ ប៉ុន្តែ​យើង​ក៏​ត្រូវ​តែ​គិត​ពី​បញ្ហា​នេះ​ដែរ ព្រោះ​គេ​ជា​គូ​ប្រជែង​ដែល​មាន​ការ​គំរាម​កំហែង​មួយ»។

ILO បាន​រាយការណ៍​ថា ការ​នាំ​ចេញ​សម្លៀក​បំពាក់ និង​ស្បែក​ជើង​នៅ​ក្នុង​រយៈពេល ៣ ខែ​ដំបូង​ឆ្នាំ ២០១៥ មាន​ចំនួន​សរុប ១,៥ ពាន់​លាន​ដុល្លារ​កើន​ឡើង ១០,៦ ភាគរយ​ធៀប​នឹង​រយៈពេល​ដូច​គ្នា​កាល​ពី​ឆ្នាំ​មុន។

តាម​របាយ​ការណ៍ ADB កំណើន​នៃ​ការ​មក​ដល់​របស់​ភ្ញៀវ​ទេសចរ​បាន​ធ្លាក់​ចុះ​ផង​ដែរ​ពី ៥,២​ភាគរយ​មក​នៅ​ត្រឹម ៤,៦​ភាគរយ ខណៈ​កំណើន​នាំ​ចេញ​ទំនិញ​សរុប​ធ្លាក់​ចុះ​ជា​មធ្យម​ពី ១៨,៣ មក​នៅ ១៤,០​ភាគរយ។

លោក គង់ សុភារក្ស ប្រធាន នាយកដ្ឋាន​ស្ថិតិ និង​ព័ត៌មាន​ក្រសួង​ទេសចរណ៍​ថ្លែង​បាន​ថា កំណើន​ទាប​ក្នុង​វិស័យ​ទេសចរណ៍​នៅ​ឆមាស​ទី១ ឆ្នាំ​២០១៥ ដោយ​សារ​តែ​កត្តា​ជា​ច្រើន​នៅ​ក្រៅ​ប្រទេស​ព្រម​ទាំង​នៅ​ក្នុង​តំបន់​អាស៊ី ដូច​ជា​ជំងឺ Mers និង​បញ្ហា​នៅ​ក្នុង​ការ​បោះ​ឆ្នោត​របស់​ប្រទេស​ថៃ ការ​ផ្ទុះ​គ្រាប់​បែក​ព្រម​ទាំង​ជម្លោះ​សមុទ្រ​ចិន​ខាង​ត្បូង​រវាង​ចិន និង​ប្រទេស​ក្នុង​តំបន់។

លោក​បន្ត​ថា៖ «ដោយ​សារ​តែ​បញ្ហា​ជាច្រើន​នៅ​ក្រៅ​ប្រទេស និង​នៅ​ក្នុង​តំបន់​អាស៊ី បាន​បណ្ដាល​ឲ្យ​ភ្ញៀវ​ទេសចរ​ភ័យ​ខ្លាច​ក្នុង​ការ​ធ្វើ​ដំណើរ​ព្រម​ទាំង​ការ​ធ្វើ​ដំណើរ​ឆ្លង​កាត់​ព្រំ​ដែន ហើយ​វា​ជា​មូល​ហេតុ​ធ្វើ​ឲ្យ​កម្ពុជា​ទទួល​បាន​ភ្ញៀវ​ទេសចរ​កាន់​តែ​ទាប»។

កំណើន​សេដ្ឋកិច្ច​កម្ពុជា​គឺ​៧,២​ភាគរយ​ពី​ឆ្នាំ​២០១៤ ហើយ​ប្រាក់​ចំណូល​ក្នុង​មនុស្ស​ម្នាក់ៗ​កើន​ឡើង ​៧៦០​ ដុល្លារ​ពី​ឆ្នាំ ​២០០៨ ដល់ ​១០៤៣​ ដុល្លារ​នៅ​ឆ្នាំ​ ២០១៣ និង​កើន​ដល់ ១១៣០ ​ដុល្លារ​ក្នុង​ឆ្នាំ​២០១៤ ហើយ​រំពឹង​ថា​នឹង​កើន​ដល់ ១២២៥​ ដុល្លារ​នៅ​ឆ្នាំ​ ២០១៥ ដែល​ធ្វើ​ឲ្យ​កម្ពុជា​ក្លាយ​ជា​ប្រទេស​មាន​ចំណូល​មធ្យម​ទាប។ នេះ​បើ​តាម​សុន្ទរ​កថា​លោក​នាយក​រដ្ឋ​មន្ត្រី​កាល​ពី​ថ្ងៃ​ចន្ទ។

របាយ​ការណ៍​ដដែល​បង្ហាញ​ដែរ​ថា អតិផរណា​មាន​តែ ១,០​ភាគរយ​ប៉ុណ្ណោះ​កាល​ពី​ខែ​ មីនា ​ឆ្នាំ​ ២០១៥ ដោយ​សារ​ការ​ធ្លាក់​ចុះ​តម្លៃ​ដឹក​ជញ្ជូន និង​តម្លៃ​ប្រេង​ឥន្ធនៈ បន្ទាប់​ពី​តម្លៃ​ប្រេង​ធ្លាក់​ចុះ​ខ្លាំង។ ការ​ព្យាករ​អតិផរណា​សម្រាប់​ឆ្នាំ​២០១៥ ត្រូវ​បាន​កែ​តម្រូវ​មក​នៅ​១,៣​ភាគរយ៕ LA

Source From:Phnom Penh Post

Wed, 23 September 2015 Ayanna Runcie

ភ្នំពេញៈ បន្ទាប់​ពី​បង្កើត​ទីតាំង​ឈរ​ជើង​នៅ​ក្នុង​ទីក្រុង​ភ្នំពេញ​មក ពេល​នេះ Burger King កំពុង​បញ្ជ្រាប​ខ្លួន​ទៅ​តាម​ខេត្ត​សំខាន់ៗ​ក្នុង​ប្រទេស​កម្ពុជា ជាមួយ​នឹង​ការ​ចាប់​ផ្ដើម​ដំណើរ​ការ​សាខា​ទី១ នៅ​ខេត្ត​សៀមរាប នៅ​ខែ​ក្រោយ។

ហាង​អាហារ​ទាន់​ចិត្ត​ដ៏​ធំ​របស់​អាមេរិក​មួយ​នេះ​កំពុង​តែ​បន្ត​ពង្រីក​ប្រតិបត្តិការ​របស់​ខ្លួន​នៅ​ទីក្រុង​ភ្នំពេញ ហើយ​គ្រោង​នឹង​បើក​ដំណើរ​ការ​សាខា​៤​នៅ​ក្រៅ​ទីក្រុង​នៅ​ត្រឹម​ចុង​ឆ្នាំ​២០១៦ នៅ​ខេត្ត​សៀមរាប ខេត្ត​ព្រះសីហនុ បាត់ដំបង និង​ប៉ោយប៉ែត។ នេះ​បើ​យោង​តាម​អ្នក​ស្រី ហ្វីន សុធានី ប្រធាន​ប្រតិបត្តិការ​ក្រុមហ៊ុន Burger King Cambodia។

Cam F&B Services ដែល​ជា​ក្រុមហ៊ុន​វិនិយោគ​រួម​រវាង​ក្រុមហ៊ុន​ពហុ​ផលិតផល Pan-Pacific Group Inc (IPP) របស់​វៀតណាម និង​ក្រុមហ៊ុន HSC Group ជា​ដៃ​គូ​ក្នុង​ស្រុក​ដែល​ប្រតិបត្តិការ​ហាង Burger King នៅ​ក្នុង​ប្រទេស​កម្ពុជា។ បច្ចុប្បន្ន​ក្រុមហ៊ុន​គ្រប់គ្រង​ហាង​ចំនួន​៥​នៅ​ទីក្រុង​ភ្នំពេញ។ ហាង​ទី ៦ ​នឹង​បើក​ដំណើរការ​នៅ​មហាវិថី​ម៉ៅ សេទុង នៅ​ក្នុង​ទីក្រុង​ភ្នំពេញ​នៅ​ខែ​ក្រោយ។ នេះ​បើ​យោង​តាម​អ្នក​ស្រី សុធានី។

សាខា​ថ្មី​នៅ​ខេត្ត​សៀមរាប​កំពុង​ត្រូវ​បាន​សាងសង់​នៅ​ក្នុង​តំបន់​ដែល​មាន​ភ្ញៀវ​ទេសចរ​ចរាចរ​ច្រើន រវាង​តំបន់ Pub Street និង​ផ្សារ​រាត្រី។ ហាង​នេះ​គ្រោង​នឹង​បើក​ដំណើរ​ការ​នៅ​ពាក់​កណ្ដាល​ខែ​តុលា។

អ្នក​ស្រី​សុធានី​បាន​ថ្លែង​ថា៖ «ខេត្ត​សៀមរាប​មាន​សក្ដានុពល​ច្រើន និង​មាន​ភ្ញៀវ​ទេសចរ​ច្រើន អ៊ីចឹង​ហើយ​បាន​ជា​យើង​នឹង​ទៅ​ទីនោះ​មុន​ខេត្ត​ផ្សេង​ទៀត»។

Burger King ជា​ហាង​អាហារ​ទាន់​ចិត្ត​អន្តរជាតិ​ទី​ពីរ​ដែល​នឹង​បើក​ដំណើរការ​នៅ​ខេត្ត​សៀមរាប​បន្ទាប់ពី​ហាង KFC ដែល​បាន​បើក​កាលពី​ឆ្នាំ​២០០៩។ ហាង​ប៊ឺហ្គឺ​ក្នុង​ស្រុក Lucky Burger ក៏មាន​សាខា​មួយ​នៅ​ទីនោះ​ដែរ។

លោក គួច សុខលី ប្រធាន​សមាគម​ភោជនីយដ្ឋាន​កម្ពុជា បាន​ថ្លែង​ថា សកម្មភាព​ទេសចរ​របស់​ខេត្ត​សៀមរាប​បាន​ក្លាយ​ជា​រង្វាន់​គួរ​ឲ្យ​ចាប់​អារម្មណ៍​សម្រាប់​ហាង​អាហារ​ទាន់​ចិត្ត​អន្តរជាតិ​ជាច្រើន។

លោក​សុខលី ដែល​ជា​នាយក​គ្រប់គ្រង​របស់​ក្រុមហ៊ុន CBM Corporation ប្រតិបត្តិការ​យីហោ​ភោជនីយដ្ឋាន​ជា​ច្រើន​រួម​មាន​យីហោ BB World យីហោ Tous Les Jours និង​យីហោ Domino’s Pizza ផង​នោះ​បាន​លើក​ឡើង​ថា៖ «Burger King ជា​យីហោ​ឈាន​មុខ​គេ​មួយ​នៅ​លើ​ពិភពលោក។ វា​នឹង​ទទួល​បាន​ជោគជ័យ​នៅ​ខេត្ត​សៀមរាប​ដោយ​សារ​តែ​ពួក​គេ​បាន​ជ្រើស​រើស​ទីតាំង​ដ៏​ត្រឹម​ត្រូវ។ យើង​មាន​ភ្ញៀវ​ទេសចរ ២,៥​ លាន​នាក់​ដែល​ចូល​មក​ទស្សនា​ខេត្ត​សៀមរាប​ក្នុង​មួយ​ឆ្នាំ»។

អ្នក​ស្រី​សុធានី​ថ្លែង​ថា ទីក្រុង​នៅ​តាម​ខេត្ត​របស់​កម្ពុជា​ភាគ​ច្រើន​មិន​មាន​ហាង​អាហារ​ទាន់​ចិត្ត។ អ្នក​ស្រី​ថា៖ «មិន​មាន​យីហោ​ច្រើន​ក្នុង​ខេត្ត​នេះ​ដើម្បី​ប្រកួត​ប្រជែង​ទេ។ យើង​ជ្រើសរើស​ខេត្ត​បាត់ដំបង ដោយ​សារ​ជា​ខេត្ត​ធំ​មួយ​ដែល​មាន​មនុស្ស​ច្រើន ហើយ​ប៉ោយប៉ែត​ជាប់​ប្រទេស​ថៃ ដូច្នេះ​ជន​បរទេស​ជា​ច្រើន​នឹង​ទៅ​ទីនោះ»។

ការ​ជំរុញ​តាម​ខេត្ត​របស់ Burger King នឹង​ធ្វើ​ឲ្យ​មាន​ការ​ប្រកួត​ប្រជែង​ជាមួយ​នឹង​ហាង​អាហារ​ទាន់​ចិត្ត​ផ្សេង​ទៀត​ដូចជា KFC ហាង Pizza Company និង​ហាង Lucky Burger ដែល​មាន​វត្តមាន​រួច​ហើយ​នៅ​ក្នុង​ទីក្រុង​តាម​ខេត្ត​មួយ​ចំនួន​របស់​កម្ពុជា។

លោក Benjamin Jerome អ្នក​គ្រប់គ្រង​ទូទៅ​នៅ​ក្រុមហ៊ុន Kampuchea Food Corporation តំណាង KFC កម្ពុជា ថ្លែងថា ហាង​មាន់​បំពង​របស់​អាមេរិក​មួយ​នេះ​បាន​មើល​ឃើញ​កំណើន​ខ្លាំង​ហួស​ពី​ទីក្រុង និង​កំពុង​ស្វែងរក​ក្នុង​ការ​ពង្រីក​ទីតាំង​ឈរ​ជើង​នៅ​តាម​ខេត្ត​ផង​ដែរ។ លោក​បញ្ជាក់​ថា KFC ដែល​ប្រតិបត្តិការ​ភោជនីយដ្ឋាន​ចំនួន​១១ នៅ​ភ្នំពេញ និង​ហាង​មួយ​នៅ​ខេត្ត​សៀមរាប នឹង​បើក​សាខា​ថ្មី​មួយ​នៅ​ខេត្ត​ព្រះសីហនុ​នៅ​ខែ​វិច្ឆិកា។

លោក​ថ្លែង​ថា៖ «យើង​នឹង​បើក​នៅ​ក្នុង​ខេត្ត​ព្រះសីហនុ​ដោយ​សារ​តែ​វា​មាន​សកម្មភាព​ពាណិជ្ជកម្ម​ច្រើន»៕ LA

Source From:Phnom Penh Post

Latest News

ដោយដែន ចែងចាំង ​ភ្នំពេញ: តម្រូវការការងារក្នុងវិស័យសំណង់ និងអចលនទ្រព្យបានកើនឡើងខ្ពស់ស្របពេលការរីកចម្រើនលើវិស័យសំណង់...
ដោយ គង់ សូរិយា ​ភ្នំពេញ: ខេត្តភូមិភាគឥសាន្តប្រទេស...
ដោយវុត្ថា យោងតាមការទិន្ន័យផ្លូវការរបស់មន្ត្រីរដ្ឋាភិបាលចិន បានបង្ហាញនៅថ្ងៃអង្គារិ៍នេះ ថា...

LATEST EXCLUSIVE LISTING

Land For Sale
Chroy Changva,Russey Keo
USD 1,090,000.00
Land For Sale
Prek Leap,Russey Keo
USD 850,000.00
Land For Rent
Prek Leap,Russey Keo
USD 1,600.00/Month
Villa For Sale
Niroth,Meanchey
USD 205,000.00
Villa For Sale
Chroy Changva,Russey Keo
USD 225,800.00

CVEA MEMBERS